თავის დროზე „ერთიანი ნაციონალური მოძრაობის“ გაყოფა უფრო ტაქტიკური სვლა იყო და დღეს ნათლად გაირკვა, რომ ისინი საერთო იდეაზე დგანან და გუნდში გადაწყვეტილებებს მხოლოდ ერთი ადამიანი იღებს, - ამის შესახებ ჟურნალისტებს „ქართული ოცნების“ დეპუტატმა ზაზა ხუციშვილმა განუცხადა.

ხუციშვილის აზრით, საპრეზიდენტო არჩევნების პირველმა ტურმა დაადასტურა, რომ „ევროპულ საქართველოს“ მაღალი რეიტინგი არ აქვს, ხოლო დავით ბაქრაძისთვის მიცემული ხმები, „ნაციონალური მოძრაობის“ პრეზიდენტობის კანდიდატზე სრულად არ გადანაწილდება.

„როცა „ნაციონალურ მოძრაობას“ 22 დეპუტატი გამოეყო, მათ თქვეს, რომ მიხეილ სააკაშვილს ყველანაირი ვადა გაუვიდა და ეს კაცი აცდენილი იყო სწორ და სახელმწიფოებრივ აზროვნებას. ახლა გვთავაზობენ, რომ ამ ადამიანს ისევ ჩააბარონ სახელმწიფო. საზოგადოებამ კარგად გაიგო, თუ რასთან გვაქვს საქმე და რა დევს ამ ყველაფრის საპირწონედ“, - აღნიშნა ზაზა ხუციშვილმა.