ატოცში კიდევ ერთხელ გამოჩნდა „ნაციონალური მოძრაობის“ სახე და ის, თუ რა ხალხი არიან ამ პარტიაში, - ამის შესახებ საპარლამენტო უმრავლესობის წევრმა, ანრი ოხანაშვილმა განაცხადა.
ოხანაშვილი გამოეხმაურა სოფელ ატოცში, მმართველი პოლიტიკური გუნდის მიერ მხარდაჭერილ საპრეზიდენტო კანდიდატს, სალომე ზურაბიშვილს და მიხეილ სააკაშვილის საპრეზიდენტო ბიბლიოთეკის წარმომადგენელს, ლანა ღვინჯილიას შორის მომხდარ ინციდენტს.
„ყველას მოეხსენება, რომ წინასაარჩევნოდ პირველი ტური ზოგადად, ძალიან ბინძური კამპანიით წარიმართა ჩვენს მიერ მხარდაჭერილი კანდიდატის მიმართ. მისი, როგორც ქალის მიმართ გაკეთდა არაერთი შეურაცხმყოფელი განცხადება. აუცილებელია ჩვენს საზოგადოებასთან ერთად მოვახდინოთ ამ ფაქტზე რეაგირება. კიდევ ერთხელ გამოჩნდა „ნაციონალური მოძრაობის“ სახე, თუ რა ხალხი არიან ამ მოძრაობაში და რა ხერხებით ცდილობენ ისინი თავიანთი ქმედებების განხორციელებას. ვუერთდები სოფო კილაძის მიმართვას იმასთან დაკავშირებით, რომ არასამთავრობო ორგანიზაციები უნდა დაინტერესდნენ ამ საკითხით“, - განაცხადა ანრი ოხანაშვილმა.