ჩვენ პენსიას გავზრდით, როგორც კი მოვალთ ხელისუფლებაში და თქვენ ამას დაინახავთ, - ამის შესახებ ფრაქცია „ნაციონალური მოძრაობის“ თავმჯდომარემ რომან გოცირიძემ პარლამენტის პლენარულ სხდომაზე განაცხადა, სადაც 2019 წლის ბიუჯეტის პროექტის განხილვა მიმდინარეობს.

რომან გოცირიძემ კონკრეტული კითხვებით მიმართა ფინანსთა მინისტრს, ივანე მაჭვარიანს, რატომ არ გაიზარდა პენსია, როგორც შარშან, ასევე 2018 წელს.

„ტრიბუნიდან იყო დემაგოგიური განცხადება იმის თაობაზე, რომ თითქოს, ახლა, დღესვე ამბობს ვიღაც, რომ პენსიას გავზრდით 400 ლარამდე. ჩვენ პენსიას გავზრდით, როგორც კი მოვალთ ხელისუფლებაში და თქვენ ამას დაინახავთ. ამიტომ მინისტრისადმი ასეთი შეკითხვა მაქვს - რატომ არ გაიზარდა, პენსია შარშან, თუნდაც 20 ლარით, რატომ არ გაიზარდა პენსია წელს, თუნდაც 20 ლარით?! ეს იქნებოდა 220 ლარი. ეს იქნებოდა იმაზე ნაკლები ვიდრე დღეს არის პენსია სომხეთში. პენსია სომხეთში 230 ლარია. საერთოდ, რატომ იყვნენ მთელი ამ პერიოდის განმავლობაში პენსიონერები დაჩაგრული“, - განაცხადა გოცირიძემ.

შეგახსენებთ, ფინანსთა მინისტრმა ივანე მაჭავარიანმა დღეს განაცხადა, რომ აბსურდული მოსაზრებები, როგორიც არის 400- ლარიანი პენსია და ავანტიურისტული მოწოდებები, საფრთხის ქვეშ დააყენებს ჩვენს განვითარებას.