პარლამენტის ვიცე-სპიკერი გია ვოლსკი „ედისონ რისერჩის“ კვლევას პროპაგანდად და საზოგადოების დათრგუნვის მცდელობად აფასებს. მისი თქმით, არჩევნების ბედი საარჩევნო ყუთებთან წყდება.
„ამ შემთხვევაში ცოტა მორიდებული ციფრი კი თქვეს, მაგრამ რეალურად, ეს არის თემა, რასაც უნდა მოჰყვეს საზოგადოების გარკვეულწილად დათრგუნვა, პროპაგანდა იმისა, რომ გადაწყვეტილია საკითხი,. მაგრამ კიდევ ერთხელ გეუბნებით, რომ არჩევნების თემა წყდება საარჩევნო ყუთებთან და საზოგადოებას კარგად ესმის, რასთანაა საქმე“, - განაცხადა გია ვოლსკიმ.
Edison Research-მა „რუსთავი 2"-ის დაკვეთით მორიგი კვლევა ჩაატარა. „რუსთავი 2"-ის ინფორმაციით, სულ 2 ათასი ამომრჩეველი გამოიკითხა.
კითხვაზე, საპრეზიდენტო არჩევნების მეორე ტური დღეს რომ ტარდებოდეს, ვის მისცემდით ხმას? სრული ალოკაციის შედეგად, შედეგები ასე გადანაწილდა: გრიგოლ ვაშაძე - 56%; სალომე ზურაბიშვილი - 44%.