ხობის მუნიციპალიტეტში სტიქიის შედეგების სალიკვიდაციო სამუშაოები მიმდინარეობს
ხობის მუნიციპალიტეტის მერი გოჩა ქაჯაია და მერის პირველი მოადგილე ვარაზ გაბედავა, შესაბამისი სამსახურის წარმომადგენლებთან ერთად, მუნიციპალიტეტის ადმინისტრაციულ ერთეულებში სტიქიის შედეგების სალიკვიდაციო სამუშაოების მიმდინარეობას გაეცნენ.
როგორც „ინტერპრესნიუსს“ ხობის მუნიციპალიტეტიდან აცნობეს, დაზარალებული მოსახლეობისთვის სახლის გადასახური მასალის მიწოდება ეტაპობრივად ხორციელდება. მათივე ინფორმაციით, პარალელურად, ძლიერი ქარის შედეგად დაზიანებული ბიის საბავშვო ბაღის და ხობში, გიორგი ჭყონდიდელის ქუჩაზე მდებარე ხუთსართულიანი საცხოვრებელი კორპუსის სახურავის რეაბილიტაცია მიმდინარეობს.
30 ნოემბერს ძლიერმა ქარმა დააზიანა საბავშვო ბაღები, საცხოვრებელი კორპუსები, ხიდი, ელექტრო გადამცემი ხაზები, სახლები და წააქცია ხეები.
