თბილისის მერი და "ქართული ოცნება- დემოკრატიული საქართველოს" გენერალური მდივანი კახა კალაძე მმართველ გუნდში დაგეგმილ ცვლილებებზე გავრცელებულ ინფორმაციას "სისულელეს" უწოდებს.

როგორც კალაძემ "ინტერპრესნიუსის" კითხვის საპასუხოდ განაცხადა, ცვლილებები საჭირო და აუცილებელია, თუმცა, როცა ეს მოხდება, საზოგადოებისთვის ცნობილი გახდება.

"სისულელეზე კომენტარს ნუ გამაკეთებინებთ, ეს არის სისულელე. ცვლილებები აუცილებელი და მნიშვნელოვანია, როცა იქნება ამის საჭიროება, აუცილებლად იქნება ცნობილი თქვენთვის და საზოგადოებისთვის",- განაცხადა კალაძემ და დასძინა:

"გადახალისება იქნება. როცა ამის საჭიროება და დრო დადგება, აუცილებლად იქნება ცნობილი თქვენთვის",- აღნიშნა კალაძემ.

ვრცელდება ინფორმაცია, რომ უახლოეს მომავალში იქნება მნიშვნელოვანი საკადრო გადაადგილებები. მათ შორის, არსებული ინფორმაციით, ცვლილება შეეხება პრემიერ-მინისტრ მამუკა ბახტაძეს და მას გიორგი გახარია ჩაანაცვლებს. ასევე, კულუარული ინფორმაციით, ცვლილებები იგეგმება "ქართული ოცნების" პოლიტსაბჭოში და მას კახა კალაძე და ირაკლი კობახიძე დატოვებენ.