კიევი-თბილისის რეისის მგზავრთა ნაწილს თბილისის აეროპორტში მესაზღვრეებმა პასპორტები ჩამოართვეს და ახლა მათ დამატებით შემოწმება უტარდებათ. როგორც „ინტერპრესნიუსს“ ერთ-ერთმა მგზავრმა აცნობა, შემოწმება მხოლოდ მამაკაცებს უტარდებათ, ხოლო ქალების შემოშვება უპრობლემოდ განხორციელდა. მგზავრის ინფორმაციით, დამატებითი შემოწმების მიზეზები მისთვის უცნობია.
როგორც „ინტერპრესნიუსს“ შინაგან საქმეთა სამინისტროში განუცხადეს, მგზავრები, რომლებსაც საბუთები ჩამოართვეს, მეორად ინსპექტირებას გადიან.
„ეს არის მეორადი ინსპექტირება, რაც არის საერთაშორისო პრაქტიკის შესაბამისი პროცედურა. მესაზღვრეები უსვამენ მათ კითხვებს, გაივლიან შემოწმებას და ჩვეულებრივ შემოვლენ. არაფერი განსაკუთრებული არ ხდება,“ - აცხადებენ უწყებაში.
რეისი კიევი -თბილისი ადგილობრივი დროით 16:10 საათზე ჩამოფრინდა.