გაერთიანებული ოპოზიცია „ძალა ერთობაშია“, 16 დეკემბერს, ინაუგურაციის პარალელურად, თელავში საპროტესტო აქციის ჩატარებას რუსთაველის ქუჩაზე გეგმავს. ამის შესახებ „ინტერპრესნიუსს“ „ნაციონალური მოძრაობის“ კახეთის რეგიონული ოფისის ხელმძღვანელმა გიორგი ბოტკოველმა განუცხადა.

გიორგი ბოტკოველმა თელავის მერიის კანცელარიას უკვე ჩააბარა დოკუმენტი, რომლის მიხედვითაც ხელმძღვანელ პირებს აცნობა, რომ 16 დეკემბრის აქციას ერეკლე მეორის ძეგლსა და მრავალწლოვან ჭადარს შორის არსებულ პერიმეტრზე გამართავენ.

მისი თქმით, პროტესტი იქნება მშვიდობიანი.

„16 დეკემბერს, თელავში, რუსთაველის ქუჩაზე ჩავატარებთ მშვიდობიან მანიფესტაციას, სადაც მოსახლეობა გამოხატავს თავის ნებას. აქ შეკრებით არანაირად არ შევუშლით ხელს დაგეგმილ ღონისძიებას. დღეს ვაცნობეთ მერიას. ეს ადგილი ყველასია. როგორც ბიძინა ივანიშვილს და სალომე ზურაბიშვილს აქვს აქ დგომის უფლება, ისევე აქვს ხალხსაც“, - განაცხადა გიორგი ბოტკოველმა.