საპროცედურო საკითხთა და წესების კომიტეტის თავმჯდომარე გიორგი კახიანი “საჯარო სამსახურის შესახებ“ კანონში დაგეგმილი ცვლილებების პროექტის გაწვევას არ გამორიცხავს.
კახიანმა “ინტერპრესნიუსთან“ საუბრისას ხაზგასმით აღნიშნა, რომ პრეზიდენტის ადმინისტრაციის თანამშრომლების ადმინისტრაციულ ხელშეკრულებებზე გადაყვანის საკანონმდებლო ინიციატივის მიმართ პირადად მისი პოზიცია უარყოფითია და მხარს არ უჭერს.
“არ გამოვრიცხავ პროექტის ინიციატორებმა კანონპროექტის გაწვევის გადაწყვეტილება მიიღონ. პირადად მე საკითხთან დაკავშირებით პოზიტიური პოზიცია არ მაქვს და მთელი რიგი კითხვები გამაჩნია. მსგავსი პოზიცია აქვს საპარლამენტო უმრავლესობის არა ერთ წევრს. ამ თემაზე კონსენსუსი არ არსებობს! ამიტომ ვფიქრობ, რომ კანონპროექტის ინიციატორები შესაბამის გადაწყვეტილებას მიიღებენ. წარმოდგენილი საკანონმდებლო ინიციატივა იმ რეფორმასა და პრინციპებს ეწინააღდეგება, რომელიც თავის დროზე საჯარო სამსახურში განვახორციელეთ. ჩვენ “საჯარო სამსახურის შესახებ“ ძალიან კარგი კანონმდებლობა მივიღეთ. ეს კანონი პროფესიული მოხელეების მიმართ მთელ რიგ გარანტიებს ადგენს. ეს ის რეფორმაა, რომელიც მოწონებული იყო როგორც საერთაშორისო ორგანიზაციების, ასევე არასამთავრობო სექტორის მხრიდან. ამ კანონის მიღებასთან მნიშვნელოვანწილად იყო დაკავშირებული ვიზალიბერალიზაციის საკითხი. არ უნდა მივიღოთ არც ერთი ისეთი ცვლილება, რომელიც შეიძლება უკან დახეულ ნაბიჯად იქნას აღქმული. პარლამენტში ინიცირებულ კანონროექტთან დაკავშირებით მთელი რიგი კითხვები არსებობს. იმის გათვალისწინებით, რომ გადაწყვეტილებებს კონსენსუსის საფუძველზე ვიღებთ, ეს მაფიქრებინებს, რომ ინიციატორებიც შესაბამის გადაწყვეტილებას მიიღებენ და პროექტს გაიწვევენ“, - განუცხადა “ინტერპრესნიუსს“ გიორგი კახიანმა.
“საჯარო სამსახურის შესახებ“ კანონში ცვლილებების ინიციატორები არიან დეპუტატები გურამ მაჭარაშვილი და რატი იონათამიშვილი.