საკონსტიტუციო სასამართლოს მეორე კოლეგიამ კერძო დაცვის სამსახურების სარჩელი პარლამენტისა და შინაგან საქმეთა სამინისტროს წინააღმდეგ ნაწილობრივ დააკმაყოფილა. საკონსტიტუციო სასამართლოში დაცვის პოლიციის დეპარტამენტის წინააღმდეგ სარჩელი არასამთავრობო ორგანიზაცია "კონკურენციის ცენტრმა" წარადგინა.
როგორც საკონსტიტუციო სასამართლოს მრჩეველმა გიორგი სულხანიშვილმა განმარტა, სსიპ დაცვის პოლიციის დეპარტამენტი 2019 წლის ივლისიდან კერძო დაცვითი ორგანიზაციების კონტროლს ვეღარ განახორციელებს.
მისი ინფორმაციით, კერძო დაცვითი საქმიანობის შესახებ საქართველოს კანონის კონკრეტული ნორმა, რომელიც სახელმწიფო უწყებას ამ ფუნქციას ანიჭებდა, საკონსტიტუციო სასამართლომ არაკონსტიტუციურად სცნო.
გიორგი სულხანიშვილის თქმით, მოსარჩელე მხარე მიიჩნევდა, რომ სახელმწიფო დაცვის დეპარტამენტის მხრიდან მათი კონტროლის შესაძლებლობა ბაზარზე ქმნიდა არაკონკურენტუნარიან გარემოს და მათ აყენებდა არათანაბარ მდგომარეობაში.
"საქართველოს საკონსტიტუციო სასამართლომ ნაწილობრივ დააკმაყოფილა კონსტიტუციური სარჩელი, სადაო ნორმები სსიპ დაცვის პოლიციის დეპარტამენტს ანიჭებდა უფლებამოსილებას განეხორციელებინა კერძო დაცვითი საქმიანობა ასევე სხვა კერძო დაცვითი კომპანიების კონტროლი. საკონსტიტუციო სასამართლომ აღნიშნა, რომ ამ ორგანოს მიერ ორი ფუნქციის განხორციელება ქმნიდა ბაზარზე არაკონკურენტუნარიან გარემოს და შესაბამისად ხსენებული ნორმა საკონსტიტუციო სასამართლომ არაკონსტიტუციურად ცნო საქართველოს კონსტიტუციის 30-ე მუხლთან",- აცხადებს გიორგი სულხანიშვილი.