საქართველოში აშშ-ს ელჩის მოვალეობის შემსრულებელი როს უილსონი აშშ-ის კონგრესის მიერ საქართველოს მხარდამჭერი კანონპროექტის მიღებას გამოეხმაურა.

„ვფიქრობ, ფაქტია, რომ საქართველოს მიმართ ფართო ორპარტიული მხარდაჭერა არის აშშ-ში. აშშ მხარს უჭერს საქართველოს დემოკრატიულ განვითარებას, საქართველოს საბაზრო განვითარებას და აშშ-საქართველოს ურთიერთობების გაღრმავებას. წლების განმავლობაში სენატისა და წარმომადგენელთა პალატის სხვადასხვა სახის მხარდაჭერა ამას მეტყველებს“, - დასძინა აშშ-ის ელჩის მოვალეობის შემსრულებელმა.

შეგახსენებთ, აშშ-ის კონგრესმა დაამტკიცა საქართველოს მხარდამჭერი ორპარტიული კანონპროექტი.

„აშშ-ის წარმომადგენელთა პალატამ ერთსულოვნად დაამტკიცა საქართველოს მხარდამჭერი ორპარტიული კანონპროექტი, რაც საქართველოსა და აშშ-ს შორის თანამშრომლობის თვისებრივად კიდევ უფრო მაღალ დონეზე აყვანის მზაობის მკაფიო დასტურია“, - აცხადებენ საქართველოს საგარეო უწყებაში.