ნინო გოგუაძემ ევროპის საბჭოში ლუგარის ლაბორატორიის შესახებ გავრცელებული დეზინფორმაციის შესახებ ისაუბრა

რუსეთის მიერ ლუგარის ლაბორატორიის შესახებ გავრცელებული დეზინფორმაცია მაგალითია, როგორ ახდენს აზრის მანიპულირებას რუსული დეზინფორმაცია და პროპაგანდა, - ამის შესახებ „ქართული ოცნების“ წევრმა ნინო გოგუაძემ ევროპის საბჭოში განაცხადა.

მისი თქმით, საზოგადოება ეძებს გამოსავალს, როგორ გაუმკალვდეს დეზინფორმაციას, რომელიც შიშსა და დესტაბილიზაციას იწვევს.

„დეზინფორმაცია და პროპაგანდა დემოკრატიული საზოგადოებების წინააღმდეგ მიმართული იარაღია. ამაზე ვწუხვართ როგორც საქართველოში, ასევე საფრანგეთში, შვედეთში, პოლონეთში და ევროპის სხვა ქვეყნებში. პოლიტიკოსები, სამოქალაქო საზოგადოება ეძებს გზებს როგორ გაუმკლავდეს დეზინფორმაციის იმ ნიაღვარს, რომელიც საზოგადოებაში მხოლოდ შიშის, უიმედობის, დესტაბილიზაციის გამომწვევია. - განაცხადა ნინო გოგუაძემ.

მისივე განმარტებით, ქართულ რეალობაში, ამ მხრივ საქართველო ნამდვილად არ არის გამონაკლისი ქვეყანა, დეზინფორმაცია და პროპაგანდა თავს ესხმის ქვეყნის პროდასავლურ მისწრაფებებს და მიზნად ისახავს ხელი შეუშალოს ქვეყნის დასავლური ინტეგრაციის პროცესს. გოგუაძის თქმით, ის მხოლოდ შიშის და არასტაბილურობის განცდის პროვოცირებას ახდენს ქვეყანაში.

„დეზინფორმაციის გავრცელების მაგალითია ლუგარის ლაბორატორიასთნ დაკავშირებული საკითხი. ეს ლაბორატორია, რომელიც ამერიკის შეერთებული შტატების მხარდაჭერით თბილისში იქნა აშენებული, წარმოადგენს სამეცნიერო ცენტრს. რუსი ოფიციალური პირები მედიის საშუალებით, ამტკიცებენ, რომ ლუგარის ლაბორატორიაში მეცნიერები ადამიანებზე სიცოცხლისთვის საშიშ ექსპერიმენტებს ატარებენ და რომ ლაბორატორია, ადამიანთა ინფიცირებისა და განადგურების მიზნით ხელოვნურ ვირუსებს ქმნის.

სინამდვილეში, ლუგარის ლაბორატორია არის სამეცნიერო ცენტრი, რომელიც უზრუნველყოფს ეპიდემიურ და ბიოლოგიურ უსაფრთხოებას არა მხოლოდ საქართველოში, არამედ, მთელ რეგიონში. იგი აწარმოებს ლაბორატორიულ ზედამხედველობას ინფექციურ და არაინფექციურ დაავადებებზე, მუშაობს როგორც დაავადებათა დროულ აღმოჩენაზე, ასევე, საზოგადოებრივ ჯანდაცვასთან დაკავშირებულ სხვა საფრთხეებზე. ამ დეზინფორმაციის ერთადერთი მიზანია საზოგადოებაში შიშის დათესვა და ჩვენი სტრატეგიული პარტნიორის მიმართ, სკეპტიკური განწყობების გაღვივების ხელშეწყობა.

დეზინფორმაციისა და პროპაგანდის გავრცელების საშუალებები მუდმივად ვითარდება და ამიტომ, მოწყვლადმა ქვეყნებმა აღნიშნულ გამოწვევასთან გასამკლავებლად ერთობლივად უნდა იმუშაონ“, - განაცხადა ნინო გოგუაძემ.

ამ კონტექსტში, ნინო გოგუაძემ საქართველოს გამოცდილებაზე ისაუბრა.

„პირველ რიგში, პროპაგანდასთან და დეზინფორმაციასთან გასამკლავებლად და მისი გავლენის შესამცირებალად თავისუფალი, დამოუკიდებელი და პლურალისტური მედიის არსებობაა საჭირო. ვფიქრობ, რომ საქართველოს მნიშვნელოვანი წარმატებების აქვს ამ მიმართულებით.

საქართველოს მთავრობის არაერთი უწყება, მათ შორის საგარეო და თავდაცვის სამინისტროები, სტრატეგიული კომუნიკაციის ფარგლებში ახორციელებენ საზოგადოების ინფორმირებას საზოგადოებაში განსაკუთრებულად მგრძნობიარე საკითხებზე, მათ შორის, საქართველოს საგარეო პოლიტიკის, თავდაცვის და უსაფრთხოების საკითხებზე.

ასევე, მნიშვნელოვანია მედიაწიგნიერების პროგრამა, რომელსაც კომუნიკაციების ეროვნული კომისია ახორციელებს და დეზინფორმაციის საკითხებთან დაკავშირებით საზოგადოებამ ცნობიერების ამაღლების პროგრამას შეეხება“, - განაცხადა გოგუაძემ.

სიტყვით გამოსვლისას, ნინო გოგუაძემ ხაზგასმით აღნიშნა, რომ აღნიშნული გამოწვევის წინაშე, მოწყვლადია ყველა ევროპული ქვეყანა.

„დეზინფორმაციის და პროპაგანდის გამკლავება და საფრთხეების შემცირება, ევროპის დემოკრატიული ქვეყნებისთვის საერთო საკითხია. მის მიმართ მოწყვლადია ყველა ევროპული ქვეყანა. მთავარი გამოწვევა, რაც ჩვენს წინაშე დგას, არის ამ ფენომენიდან მომდინარე საფრთხეების გაცნობიერების და კოორდინირებული გადაწყვეტილებების ნაკლებობა. მისასალმებელია საპარლამენტო ასამბლეის ძალისხმევა ამ საერთო მიდგომების ძიებისთვის“, - განაცხადა ნინო გოგუაძემ.

აღნიშნულ ინფორმაციას საქართველოს პარლამენტის პრესსამსახური ავრცელებს.

დავით უსუფაშვილი - ახლა ივანიშვილის შუის გაკრეფის კონცეფცია ეხება ყველას, ვინც მის ორბიტაზე არაა, გასაკრეფია, რადგან სახიფათო და პრობლემურია
ქართული პრესის მიმოხილვა 24.08.2019
ვალერი სოლოვეი - კრემლის ქმედებების მოაზროვნე გამმართლებლები, ვინც საქართველოს საქმეებში ჩახედულია, თვლიან, რომ რუსეთს აღარ შეუძლია საქართველოს  პოლიტიკაზე გავლენის მოხდენა
ზაზა ფაჩულიამ „არქი“ იყიდა