საქართველოს კანონის შესაბამისად, დაგროვებითი პენსიის სისტემას 1 იანვრიდან სს ,,ენერგო-პრო ჯორჯია“ შეუერთდა.
როგორც „ინტერპრესნიუსს“ კომპანიიდან აცნობეს, კომპანიის ყველა თანამშრომელი მაქსიმალურად ინფორმირებულია საპენსიო ახალი რეფორმის შესახებ. ადამიანური რესურსების მართვის დეპარტამენტის წარმომადგენლებმა, სათავო ოფისში და რეგიონებში, კომპანიის ყველა ფილიალში ჩაატარეს პრეზენტაციები, სადაც დაწვრილებით იყო განმარტებული ყველა დეტალი. თანამშრომლებმა ასევე მიიღეს ინფორმაცია მეილებით და სმს-ებით.
„კომპანია არის ერთ-ერთი მსხვილი დამსაქმებელი საქართველოში, სადაც ამჟამად 6 ათასამდე ადამიანი მუშაობს. ყველა რეფორმას, იქნება ეს საფინანსო თუ სხვა, ვიღებთ როგორც ამას კანონი მოითხოვს, განვიხილავთ და ვაკვირდებით თუ როგორ აისახება ახალი გადაწყვეტილება კომპანიაზე და თითოეულ ჩვენს თანამშრომელზე“, - განაცხადა ,,ენერგო-პრო ჯორჯიას“ გენერალურმა დირექტორმა მიხეილ ბოცვაძემ.
ცნობისთვის, კომპანიაში არსებული 6 ათასამდე თანამშრომლიდან, დაახლოებით 30% არის 40 წელს ქვემოთ, 50% არის 40 წელს გადაცილებული, ხოლო 20% 55-60 წელს ზემოთ ასაკის ადამიანი.