საქართველოში დაკავებული ბრიტანეთის მოქალაქის, ჯეკ შეფერდის საექსტრადიციო პატიმრობაზე თბილისის საქალაქო სასამართლოში ამ წუთებში მსჯელობენ.
როგორც სასამართლო სხდომაზე პროკურორმა ქეთი გურაშვილმა საკუთარ შუამდგომლობაში განმარტა, ჯეკ შეფერდი მანჩესტერის ინტერპოლის მიერ იყო ძებნილი და მას განზრახვის გარეშე, უხეში დარღვევით გაუფრთხილებლობით სიცოცხლის მოსპობაში სასამართლომ დაუსწრებლად მიუსაჯა 6 წლით პატიმრობა.
პროკურორის განცხადებითვე, შეფერდი დევიდ ბიჩზე თავდასხმის ბრალდებითაც იძებნება.
პროკურორმა დაკავებულის მიმალვისა და ახალი დანაშაულის ჩადენის საფრთხეზე ისაუბრა. მისივე განმარტებით, შეფერდს სუიციდური მიდრეკილება აქვს და ძალადობის გამოვლინება ახასიათებს.
სახელმწიფო ბრალდება შეფერდისთვის საექსტრადიციო პატიმრობას 3 თვის ვადით ითხოვს.
შეფერდის ადვოკატის, ტარიელ კაკაბაძის განცხადებით, მისი დაცვის ქვეშ მყოფს დაემუქრნენ. შესაბამისად, ადვოკატის თქმით, თუკი, შეფერდის ექსტრადირება მოხდება, მის სიცოცხლესა და ჯანმრთელობას საფრთხე შეექმნება.
სასამართლო სხდომას აშუქებს უცხოური მედიაც. მოსამართლე რომან ხორავამ ფოტო, ვიდეო-აუდიო გადაღებაზე ყველა უცხოური მედიასაშუალების განცხადება დააკმაყოფილა.
შეგახსენებთ, რომ ბრიტანეთის მოქალაქე ჯეკ შეფერდი, რომელიც საქართველოში მიმალვაში იმყოფებოდა, ახალგაზრდა ქალის გაუფრთხილებლობით სიცოცხლის მოსპობაშია მსჯავრდებული. უცხოური მედიის ინფორმაციით, შეფერდი საკუთარ კატერს ნასვამ მდგომარეობაში მართავდა, სიჩქარის გადაჭარბების გამო კატერი გადაბრუნდა, რასაც მისი მეგობარი გოგონა, 24 წლის შარლოტა ბრაუნის სიცოცხლე ემსხვერპლა.
საქართველოს შინაგან საქმეთა სამინისტრო გაერთიანებული სამეფოს ძებნილი მოქალაქის დაკავების შესახებ ოფიციალურ ინფორმაციას ავრცელებს. უწყების ცნობით, შინაგან საქმეთა სამინისტრომ გაერთიანებული სამეფოს ძებნილი მოქალაქე თბილისში დააკავა. 1987 წელს დაბადებულ ჯ.ს.შ. ვაკე-საბურთალოს პოლიციის სამმართველოში 23 იანვარს ადვოკატებთან ერთად გამოცხადდა.