დღევანდელ სასამართლო სხდომაზე ბრალდების მხარე რამე სახის მოთხოვნას არ აფიქსირებდა. ჯეკ შეფერდის გადასაწყვეტი იყო, დაჩქარებული წესით ექსტრადირების უფლებით ისარგებლებდა თუ არა, რაზეც მან უარი განაცხადა, - ამის შესახებ საქართველოში დაკავებული ბრიტანეთის მოქალაქის, ჯეკ შეფერდის საქმის პროკურორმა, ქეთევან გურაშვილმა განაცხადა.
როგორც გურაშვილი განმარტავს, ამის შემდეგ ექსტრადირების საკითხის განხილვა სტანდარტული წესით გაგრძელდება. "ჯეკ შეფერდს ნამდვილად ჰქონდა უფლება, უარი განეცხადებინა კანონით მინიჭებული ამ უფლებით სარგებლობაზე. ამის შემდეგ ექსტრადირების საკითხის განხილვა სტანდარტული წესით გაგრძელდება. დიდი ბრიტანეთიდან შესაბამისი საქმის მასალები გადმოიგზავნება, ითარგმნება ქართულად, გენერალური პროკურატურის თანამშრომლები შეისწავლიან საქმის მასალებს და გონივრულ ვადაში მიმართავენ სასამართლოს",- განაცხადა გურაშვილმა.
შეგახსენებთ, რომ ბრიტანეთის მოქალაქე ჯეკ შეფერდი, რომელიც საქართველოში მიმალვაში იმყოფებოდა, ახალგაზრდა ქალის გაუფრთხილებლობით სიცოცხლის მოსპობაშია მსჯავრდებული. უცხოური მედიის ინფორმაციით, შეფერდი საკუთარ კატერს ნასვამ მდგომარეობაში მართავდა, სიჩქარის გადაჭარბების გამო კატერი გადაბრუნდა, რასაც მისი მეგობარი გოგონა, 24 წლის შარლოტა ბრაუნის სიცოცხლე ემსხვერპლა.
საქართველოს შინაგან საქმეთა სამინისტრო გაერთიანებული სამეფოს ძებნილი მოქალაქის დაკავების შესახებ ოფიციალურ ინფორმაციას ავრცელებს.უწყების ცნობით, შინაგან საქმეთა სამინისტრომ გაერთიანებული სამეფოს ძებნილი მოქალაქე თბილისში დააკავა. 1987 წელს დაბადებულ ჯ.ს.შ. ვაკე-საბურთალოს პოლიციის სამმართველოში 23 იანვარს ადვოკატებთან ერთად გამოცხადდა და საქართველოს პოლიციას ჩაბარდა.