ცხადია, ასადის რეჟიმის მხრიდან აღიარება საერთაშორისო არენაზე არაფერს ცვლის, მაგრამ კონკრეტული პოზიციის გამოხატვა, რომ ეს აბსოლუტურად მიუღებელია, ძალიან მნიშვნელოვანია, - ამის შესახებ შერიგებისა და სამოქალაქო თანასწორობის საკითხებში სახელმწიფო მინისტრმა ქეთევან ციხელაშვილმა აშშ-ის კონგრესისადმი წარდგენილი რეზოლუციის საკითხის კომენტირებისას განაცხადა.
მისივე თქმით, რეზოლუციაში ძალიან ცალსახადაა მხარდაჭერილი საქართველოს ტერიტორიული მთლიანობა და სუვერენიტეტი.
„მე ვფიქრობ, ძალიან მნიშვნელოვანი ნაბიჯია და ცხადია, გამომდინარეობს იმ შეუქცევადი პოლიტიკიდან, რასაც აშშ და ყველა ჩვენი პარტნიორი ატარებს წლების განმავლობაში. პირველ რიგში, ძალიან ცალსახადაა მხარდაჭერილი საქართველოს ტერიტორიული მთლიანობა და სუვერენიტეტი და დაგმობილია ყველა ის მოქმედება, რომელიც ამ პრინციპების ხელყოფისთვის ხორციელდება. ძალიან მნიშვნელოვანი პუნქტებია იქ, მათ შორის რუსეთის ჩარევაზე, დაწყებული 90-იანი წლებიდან, 2008 წლის და მიმდინარე დღეების ჩათვლით. ის საოკუპაციო პოლიტიკა, რომელიც მოსახლეობას ყოველდღიურ გამოწვევას უქმნის, ყველას წინააღმდეგ მუშაობს, განურჩევლად ეთნიკური წარმომავლობისა. ცხადია, ასადის რეჟიმის მხრიდან აღიარება საერთაშორისო არენაზე არაფერს ცვლის, მაგრამ კონკრეტული პოზიციის გამოხატვა, რომ ეს აბსოლუტურად მიუღებელია, ძალიან მნიშვნელოვანია და კიდევ ერთხელ იმის დემონტრირებაა, რომ ჩვენი ტერიტორიული მთლიანობისა და სუვერენიტეტის მიმართ მხარდაჭერა მყარია. რუსეთის საოკუპაციო და ძალისმიერი პოლიტიკის მიმართ აბსოლუტურად ერთიანი პოზიცია აქვს საერთაშორისო საზოგადოებას", - განაცხადა ციხელაშვილმა.
შეგახსენებთ, რომ აშშ-ის კონგრესს სირიის მიერ საქართველოს რეგიონების - აფხაზეთისა და სამხრეთ ოსეთის/ცხინვალის რეგიონის დამოუკიდებლობის აღიარების დამგმობი რეზოლუცია წარედგინა. რეზოლუცია კიდევ ერთხელ ხაზს უსვამს საქართველოს სუვერენიტეტისა და ტერიტორიული მთლიანობისადმი აშშ-ის მტკიცე მხარდაჭერას და გმობს რუსეთის ფედერაციის მიერ საქართველოს რეგიონების - აფხაზეთისა და სამხრეთ ოსეთის/ცხინვალის რეგიონის ოკუპირებას.