ქართული პრესის მიმოხილვა 18.02.2019

სანდრო თვალჭრელიძე - “ხაზარაძეს ასე უყენებენ საკითხს: თუ სურს ბანკის შენარჩუნება, უნდა წავიდეს ანაკლიიდან”

ფოფხაძე მოსამართლეთა უვადოდ დანიშვნის საერთოდ გაუქმებას ითხოვს

დავით უსუფაშვილი - “რატომ იჩივლა ხაზარაძემ ივანიშვილთან, ჩხარტიშვილი მჩაგრავსო?”

* * *

სანდრო თვალჭრელიძე - “ხაზარაძეს ასე უყენებენ საკითხს: თუ სურს ბანკის შენარჩუნება, უნდა წავიდეს ანაკლიიდან”

“ჩემთვის ღიმილის მომგვრელია ვარაუდი, თითქოს ბიძინა ივანიშვილს სურს “თიბისი ბანკის” ხელში ჩაგდება. მიუხედავად მისი ფინანსებისა თუ გავლენისა, ახლა მიმდინარე პროცესს ის მარტო ვერაფრით წამოიწყებდა და, ჩემი აზრით, კონკრეტულად ბანკი არ არის ამ ყველაფრის სამიზნე... გაიხსენეთ, რა მოხდა და, ფაქტობრივად, რა საერთაშორისო სკანდალი ატყდა “რუსთავი 2”-ის საქმეზე, ვისაც არ ეზარებოდა, ევროკავშირით დაწყებული, აქ არსებული საელჩოებით დასრულებული, ყველა აკეთებდა განცხადებას, “თიბისი ბანკზე” კი კომენტარს არავინ აკეთებს...”, - აცხადებს ექსპერტი სანდრო თვალჭრელიძე გაზეთ “კვირის პალიტრისთვის” მიცემულ ინტერვიუში, სათაურით “ხაზარაძეს ასე უყენებენ საკითხს: თუ სურს ბანკის შენარჩუნება, უნდა წავიდეს ანაკლიიდან” / “ანაკლიის პორტი, შეიძლება ითქვას, არის ზბიგნევ ბჟეზინსკის გეგმების გაგრძელება, რაც აშშ-ის გავლენის გაძლიერებას გულისხმობს. ის იქნება ყველაზე მნიშვნელოვანი და ღრმა პორტი შავ ზღვაში, თუ სევასტოპოლს არ ჩავთვლით” / “წარმოგიდგენიათ, მთავარსარდალს არ ეცოდინება, რა ხდება უშიშროების საბჭოში და რა საფრთხეები ემუქრება ქვეყანას”.

“ჩვენ მოვისმინეთ მხოლოდ საფრანგეთისა და ჰოლანდიის ელჩების განცხადებები, ოღონდ ძალზე ნეიტრალური, დაახლოებით იმ შინაარსის, რომ პროცესებს აკვირდებიან... მეტიც, ეროვნული ბანკის მიერ მამუკა ხაზარაძისა და ბადრი ჯაფარიძის “თიბისი ბანკის” მართვიდან ჩამოშორების მოთხოვნის შემდეგ საერთაშორისო სავალუტო ფონდის მუდმივმა წარმომადგენელმა ფრანსუა პეშომ განაცხადა, მიგვაჩნია, რომ ეროვნული ბანკი, როგორც საქართველოს საფინანსო სისტემის ზედამხედველი, თავის საქმეს აკეთებს საკუთარი პასუხისმგებლობების გათვალისწინებითო. სავალუტო ფონდის წარმომადგენელმა, ფაქტობრივად, “გააპრავა” ეროვნული ბანკის მოთხოვნა, თან არ დაგავიწყდეთ, ეს განცხადება გაკეთდა ეროვნული ბანკის გადაწყვეტილებიდან რამდენიმე საათში. ამიტომ დამრჩა შთაბეჭდილება, რომ ეს შეთანხმებული იყო. წარმოუდგენელია იმის დაშვება, რომ პეშომ არ იცის, თუ რა ხდება რეალურად ქვეყნის ერთ-ერთ უძლიერეს ფინანსურ ინსტიტუტთან, “თიბისი ბანკთან” დაკავშირებით. კიდევ ერთი ფაქტი, რაც გვარიან ეჭვებს აჩენს, შეეხება “თიბისი ბანკის” უცხოელ აქციონერებს. მოგეხსენებათ, 11 წლის წინანდელი ტრანზაქციის შესახებ საქმე პროკურატურას რამდენიმე თვის წინ გადასცეს, თუმცა აქციონერების პროტესტი არ გვსმენია. არადა, როგორც ვიცი, “თიბისი ბანკში” ქართველი აქციონერები უმცირესობაში არიან, მათ დიდ წილს უცხოელები შეადგენენ, მათ შორის ისეთი ინსტიტუციებიც, როგორიცაა ევროპის რეკონსტრუქციისა და განვითარების ბანკი, საერთაშორისო ფინანსური კორპორაცია და ა.შ. ისინი ამ დრომდე ჩუმად არიან, საკითხავია, რატომ?”, - აღნიშნავს გამოცემის კორესპონდენტთან საუბრისას სანდრო თვალჭრელიძე.

“ის, რომ თუნდაც საერთაშორისო საფინანსო კორპორაციის გამოხმაურება ჯერ არ ჩანს, მაფიქრებინებს, რომ საქმე გაცილებით რთულად არის, ვიდრე ჩვენ გვესახება. რაც შეეხება ბრალდებას და 11 წლის წინანდელ ტრანზაქციას, მთელი ამ 11 წლის განმავლობაში ჩატარებულ აუდიტორულ დასკვნასა თუ ანგარიშებს ეროვნული ბანკი ჩვეულებრივ იღებდა. მათთვის დღემდე ყველაფერი რიგზე იყო და უცებ გამოინახა რაღაც ტრანზაქცია, რომლითაც კანონი დაირღვა. ხომ ცხადზე ცხადია, რომ ეს მხოლოდ საბაბია, როგორც ჩანს, სხვა ვერაფერი იპოვეს, ოღონდ საბაბია არა იმისთვის, რომ ბანკი ვინმემ ჩაიგდოს ხელში, არამედ იმისთვის, რომ იქ მენეჯმენტი შეცვალონ... რატომ გახდა ეს საკითხი მაინცდამაინც აქტუალური მაშინ, როდესაც “თიბისი ბანკი” შევიდა ანაკლიის ღრმაწყლოვანი პორტის საქმეში? სწორედ აქ არის დამარხული ძაღლის თავი. ჩემი აზრით, საქმე გაცილებით სახიფათოდ არის, ვიდრე ვიღაც ერთი გავლენიანი ქართველის მცდელობაა, ჩაიგდოს ხელში ბანკი ან ანაკლიის პორტი... გეთანხმებით, რომ რუსეთი ყველაზე მეტად არის დაინტერესებული ამ პროექტის ჩაშლით, შესაბამისად, ამ ვარაუდს აქვს საფუძველი, თუმცა მე მაკვირვებს აშშ-ის პოზიცია. წესით, უკვე განგაშის ზარი უნდა ჩამოეკრათ, ჩვენ კი საქართველოში აშშ-ის ელჩის მოვალეობის შემსრულებლის მხოლოდ ერთი განცხადება მოვისმინეთ. ჩემი აზრით, “თიბისი ბანკის” უცხოელ აქციონერებზე არ უნდა ჰქონდეს რუსეთს ისეთი გავლენა, რომ ისინი ასე გაჩუმებულიყვნენ. ვფიქრობ, მათი მონაწილეობისა და ჩუმი შეთანხმების გარეშე ეს პროცესები ვერ დაიწყებოდა”, - განაგრძობს ექსპერტი.

“დავუშვათ, ეს რუსეთის წამოწყებული პროცესია, მან რაღაც ანკესი გადაუგდო ივანიშვილს, რომელიც წამოეგო და ჩაერთო ამ პროცესში, თავის მხრივ, მან მასში ჩართო პროკურატურა და ეროვნული ბანკი, მაგრამ რას აკეთებენ ამ დროს აშშ და საერთაშორისო ორგანიზაციები, რომელთა უმნიშვნელოვანესი ინტერესიც არის ანაკლიის პორტის მშენებლობა?! ამიტომ კიდევ ერთი ვარაუდის საფუძველს ვხედავ: ხომ არ დაუპირისპირდა მამუკა ხაზარაძის გუნდი დიდი ქვეყნების რაღაც დიდ, სტრატეგიულ ინტერესებს? არ ვიცი, ამის მიზეზი რა შეიძლება ყოფილიყო. ფაქტი ერთია, რომელიღაც დიდი ძალაა დაინტერესებული, რომ ანაკლიის პორტის მშენებლობაში მენეჯმენტი შეიცვალოს. აშკარად ძალიან ძლიერი საერთაშორისო ლობისტური ჯგუფები არიან ამ პროცესში ჩართული. აშკარად ასე უყენებენ ხაზარაძეს საკითხს: თუ სურს ბანკის შენარჩუნება, უნდა გამოვიდეს ანაკლიის პროექტიდან. აქვე კიდევ ერთხელ ვიტყვი, ეს არის მხოლოდ ჩემი ვარაუდები საჯაროდ ცნობილ ფაქტებზე დაყრდნობით და არანაირ დამატებით ინფორმაციას არ ვფლობ”, - ამბობს რესპონდენტი.

“აუცილებლად უნდა ვთქვა ერთი რამ - ჩვენთვის სასიცოცხლოდ მნიშვნელოვანია, რომ ეს პორტი აშენდეს, მას ქვეყნისთვის სტრატეგიული მნიშვნელობა აქვს. ჯერ კიდევ გეოლოგიის ინსტიტუტის დირექტორის მოადგილე გახლდით, როდესაც ღრმაწყლოვანი პორტისთვის ადგილის მოსაძებნად კვლევები დაიწყო. დაახლოებით 90-იანი წლების დასაწყისის ამბავს გიყვებით. სწორედ იმჟამად შეირჩა ანაკლია. ანაკლიის პორტი, შეიძლება ითქვას, არის ზბიგნევ ბჟეზინსკის გეგმების გაგრძელება, რაც აშშ-ის გავლენის გაძლიერებას გულისხმობს. ის იქნება ყველაზე მნიშვნელოვანი და ღრმა პორტი შავ ზღვაში, თუ სევასტოპოლს არ ჩავთვლით. შესაბამისად, რუსეთი ხელის შეშლას ყველანაირად შეეცდება. ვფიქრობ, ერთი საერთაშორისო ჯგუფი, რომელშიც შედის მამუკა ხაზარაძე, დაუპირისპირდა მეორე ასევე საერთაშორისო ჯგუფს, რომელსაც ასევე ჰყავს ქართველი მონაწილეები, შესაძლოა მათ შორის ბიძინა ივანიშვილიც არის. არ გამოვრიცხავ ამავე ჯგუფში იყოს ვანო ჩხარტიშვილიც. როგორც წესი, სადაც რაღაც ინტრიგებია, ის პირველ რიგებშია ხოლმე, თუმცა ამ შემთხვევაში, სავარაუდოდ, ის ფოთოლია, რომელიც დინებას მიჰყვება, ის ამხელა ნიაღვარს ვერ გამოიწვევდა. სამწუხაროდ, ჯერჯერობით ისე ჩანს, რომ ამერიკის ფინანსური ინსტიტუტები მამუკა ხაზარაძეს არ დაიცავენ. ღმერთმა ქნას, ვცდებოდე”, - მიიჩნევს სანდრო თვალჭრელიძე.

“თიბისი ბანკს”, ჩემი აზრით, საფრთხე არ ემუქრება. გავიხსენოთ, “საქართველოს ბანკში” რამდენჯერ შეიცვალა ბოლო ხანს სამეთვალყურეო საბჭო და მენეჯმენტი, გავიგეთ ამის თაობაზე რამე? არც არაფერი. უმეტესობამ ისიც არ ვიცით, ალბათ, ვინ არის საერთოდ მისი გენდირექტორი. მამუკა ხაზარაძე იმიტომ არის ასეთი ცნობილი, რომ ის არ არის მხოლოდ ბანკირი, ის საზოგადოებრივად აქტიური ადამიანია, რომელიც მასშტაბურ საქველმოქმედო საქმიანობას ეწევა, მონაწილეობს ბევრ სოციალურ პროექტში და თავისი ქვეყნის პატრიოტია. ვფიქრობ, “თიბისი ბანკში” მენეჯმენტი შეიცვლება, შესაძლოა დროებითაც, და ყველაფერი ჩვეულებრივ გაგრძელდება... არ გამოვრიცხავ, ამ პროცესების მერე ხაზარაძე პოლიტიკურადაც გააქტიურდეს. მასზე ამ ბოლო დროს მოვისმინე განცხადებები, თითქოს ის ყოველთვის ყველა ხელისუფლებასთან თანამშრომლობდა. არადა, დანამდვილებით ვიცი, რომ ასე არ იყო. მაგალითად, მან თავის დროზე მიხეილ სააკაშვილისთვის 50-მილიონიანი კრედიტის გაცემაზე უარი თქვა....”, - დასძენს ექსპერტი და შეკითხვაზე - “უნდა ჩაერთოს თუ არა პრეზიდენტი, ქვეყნის მთავარსარდალი, უშიშროების საბჭოს მუშაობაში?” - პასუხობს;

“ეს ყველაფერი სასაცილოა, სატირალი რომ არ იყოს. წარმოგიდგენიათ, მთავარსარდალს არ ეცოდინება, რა ხდება უშიშროების საბჭოში და რა საფრთხეები ემუქრება ქვეყანას. ახლა გაიძახიან, მივაწვდით ინფორმაციასო, კანონს რომ წერდნენ, მაშინ სად იყვნენ?! ჩემი აზრით, ეს კონსტიტუციის ერთ-ერთი ფუძემდებლური ხარვეზია. ალბათ, იპოვიან რაიმე გამოსავალს, თუმცა იმედია, ამისთვის კონსტიტუციას ისევ არ შეცვლიან”.

“ისეთი შთაბეჭდილება მრჩება, რომ უზენაესი სასამართლოს მოსამართლეების დანიშვნის საქმეში გადაიდგა მცირე, მაგრამ პოზიტიური ნაბიჯი და ამ ე.წ. პირველი რანგის ოდიოზურ ფიგურებს აღარ დანიშნავენ, მაგრამ ვინ იქნებიან ის მოსამართლეები, რომლებსაც წარადგენენ? ოდნავ ნაკლებად ოდიოზურები და მორჩილები? მათ, სავარაუდოდ, არ ვიცნობთ ისე კარგად, როგორც მურუსიძეს, მეთოფიშვილს, მიქაუტაძესა და სხვებს. ჩემი აზრით, სასამართლო სისტემიდან ძალიან ბევრი მოსამართლეა გასაშვები, არათუ უვადოდ დასანიშნი, თუმცა ეს არ ნიშნავს, რომ ამ სფეროში წესიერი და კვალიფიციური ადამიანები არ არიან. საკანონმდებლო ცვლილებები შეეხება უზენაეს სასამართლოს, მაგრამ რა ეშველებათ იმათ, ვინც უკვე დაინიშნენ უვადოდ და ამას არ იმსახურებენ? მე იურისტი არა ვარ, მაგრამ დარწმუნებული ვარ, იქნება ბერკეტები, რომლებიც საკანონმდებლო ჩარჩოში მოაქცევს იუსტიციის საბჭოს მიღებულ გადაწყვეტილებებს და მათზე მორატორიუმის გამოცხადებას, ასევე უზრუნველყოფს მისი ახლებური წესითა და ფორმატით დაკომპლექტებას. დღეს მნიშვნელოვანია, ამ ფორმითა და ამ შემადგენლობით იუსტიციის საბჭომ არსებობა დაასრულოს და უზენაეს სასამართლოში დაინიშნონ მაქსიმალურად პატიოსანი და მაღალი კომპეტენციის ადამიანები”, - დაასკვნის თვალჭრელიძე.

ფოფხაძე მოსამართლეთა უვადოდ დანიშვნის საერთოდ გაუქმებას ითხოვს

“ოხანაშვილს დავურეკე, ვკითხე და მითხრა, რომ მაქსიმალურად მოკლე ვადებში ჩანიშნავდა (იურიდიული კომიტეტის სხდომას)... მე მგონია, რომ ამ პროექტის პოლიტიკური მხარდაჭერა იმდენად მნიშვნელოვანია, რომ მორალურად ყველა ვალდებულია მხარი დაუჭიროს ამ ინიციატივას”, - აცხადებს „ქართული ოცნების" წევრი გედევან ფოფხაძეეკა ბესელიას საკანონმდებლო ინიციატივაზე საუბრისას, რომელიც მოსამართლეების უვადოდ დანიშვნის შეჩერებას გულისხმობს. “რეზონანსთან” საუბრისას ფოფხაძემ განაცხადა, რომ პარლამენტის იურიდიულ საკითხთა კომიტეტის სხდომა, რომელზეც მოსამართლეების უვადოდ დანიშვნის შეჩერების საკითხი უნდა განიხილონ, სავარაუდოდ, ამ კვირაში ჩატარდება”, - წერს გაზეთი “რეზონანსი” სტატიაში სათაურით „ხომ არ ჯობია, რომ კონსტიტუციაში გაუქმდეს ეს ჩანაწერი...“ - ფოფხაძე მოსამართლეთა უვადოდ დანიშვნის საერთოდ გაუქმებას ითხოვს.

“მე აღარ ვარ იურიდიული კომიტეტის წევრი და ზუსტი ინფორმაცია არ მაქვს. არა მგონია, რომ ძალიან გააჭიანურონ ეს პროცესი. გარანტირებულად ვერ გეტყვით, მაგრამ, ალბათ, ამ კვირაში განიხილავენ. მე ანრი ოხანაშვილს დავურეკე, ვკითხე და მითხრა, რომ მაქსიმალურად მოკლე ვადებში ჩანიშნავდა”, - აღნიშნა გედევან ფოფხაძემ. მისივე თქმით, წინასწარ რაიმე პროგნოზის გაკეთება რთულია, ამ საკითხთან დაკავშირებით ბევრ ადამიანს თავისი პოზიცია აქვს და მიუხედავად იმისა, თუ როგორ დასრულდება იურიდიულ კომიტეტის სხდომა, ამ ინიციატივასთან დაკავშირებით, საკითხი საპარლამენტო სესიაზე გავა და იქ დეპუტატებს თავად ექნებათ კენჭისყრაში მონაწილეობის საშუალება: “მე პროგნოზები რატომ უნდა ვაკეთო? არიან კომიტეტის წევრები და პარლამენტარები, რომლებსაც ჰგონიათ, რომ სამართლებრივად ეს ინიციატივა არაა სრულფასოვანი და კონსტიტუციასთან შეუსაბამოა. ჩვენც ასე რომ მიგვაჩნდეს, ასეთი ინიციატივით არ შემოვიდოდით. საბოლოო ჯამში, როგორი კამათიც არ უნდა იყოს იმასთან დაკავშირებით კონსტიტუციურია თუ არა, ამას საკონსტიტუციო სასამართლო ადგენს. პარლამენტში ყოფილა მიღებული გადაწყვეტილებები, რომელიც შემდეგ საკონსტიტუციო სასამართლოს გაუუქმებია”, - ამბობს ფოფხაძე, რომლის აზრით, “არასწორადაც გაუკეთებია ეს”, - აღნიშნავს გამოცემა.

“ამიტომ, ჩემი აზრით, დღეს უნდა შევთანხმდეთ იმაზე, რომ გვაქვს მოცემულობა, რომლის მიხედვითაც უვადოდ დანიშვნებმა მიიღო ძალიან ცუდი ხასიათი და სასამართლო სისტემა ამით ზარალდება. ხოლო თუ ჩვენ ვფიქრობთ სასამართლო სისტემის გაჯანსაღებაზე, იქ ახალი სისხლის, ახალი ადამიანების საჭიროებაზე, ერთი კლანის მიერ, ერთადერთი მოტივაციით დანიშნული ადამიანები - რომ შემდეგ ისინიც ამ კლანის ნაწილი ყოფილიყვნენ და ემსახურონ არა ქართულ მართლმსაჯულებას, არამედ რაღაც ჯგუფურ ინტერესებს - ამ მოტივაციით დანიშნული ადამიანები მართლმსაჯულებას კარგს არაფერს არ მოუტანენ, მით უმეტეს თუ ისინი უვადოდ ინიშნებიან. ამიტომ, საჭიროა, რომ ახლა ეს საკითხი შეჩერდეს და საერთოდ, ვიფიქროთ იმაზე -ხომ არ ჯობია, რომ კონსტიტუციაში გაუქმდეს ეს ჩანაწერი და აღარ იყოს უვადოდ დანიშნული მოსამართლეები ქვეყანაში. ეს იმდენად ღირებულია, რომ ამ თემაზე პარლამენტი სერიოზულად უნდა დაფიქრდეს”, - აცხადებს გამოცემის კორესპონდენტთან საუბრისას გედევან ფოფხაძე.

“თუ ჩვენ სამართლებრივ ფორმაზე შევთანხმდებით, მაშინ კონსტიტუცია უნდა შევცვალოთ, რადგან ამას აქვს თავის პოლიტიკური ფასი. რაც შეეხება იურიდიული კომიტეტის გეგმებს, ის ამ პროექტის განხილვას ვერ შეაჩერებს. კომიტეტს უბრალოდ შეუძლია, რომ უარყოფითი დასკვნა დადოს, მაგრამ სესიაზე კანონპროექტი მაინც გავა და პარლამენტის წევრებს მაინც ექნებათ იმის საშუალება, რომ კენჭისყრაში მიიღონ მონაწილეობა. მე მგონია, რომ ამ პროექტის პოლიტიკური მხარდაჭერა იმდენად მნიშვნელოვანია, რომ მორალურად ყველა ვალდებულია მხარი დაუჭიროს ამ ინიციატივას. მე იურიდიული კომიტეტიდან გამომიწვიეს და, ჩემი აზრით, სწორედ იმიტომ გააკეთეს ეს, რომ არ უნდოდათ განსხვავებული აზრის მქონე ადამიანი კომიტეტში -ერთით ნაკლები დატოვეს ის ადამიანები, ვისაც განსხვავებული პოზიცია აქვს. მე ამ გადაწყვეტილებას არ დავეთანხმე, დავაფიქსირე ეს პოზიცია და, მიმაჩნია, რომ სიმართლის დადგენა რაოდენობით არ უნდა ხდებოდეს. მესმის, რომ უმრავლესობა შეიძლება ჩვენზე, მის გარკვეულ წევრებზე მეტად კონფორმისტი იყოს, მაგრამ ასე არ უნდა წყდებოდეს საკითხები. უნდა გვქოდეს საშუალება, რომ ჩვენი განსხვავებული აზრი სადღაც, რაღაც სივრცეში ვამტკიცოთ”, - დაასკვნის რესპონდენტი.

დავით უსუფაშვილი - “რატომ იჩივლა ხაზარაძემ ივანიშვილთან, ჩხარტიშვილი მჩაგრავსო?”

“უსაფრთხოების საბჭოს სისტემაში პრეზიდენტის ვერ თუ არგათვალისწინებით ინსტიტუციურ-პერსონალური კონფლიქტებისთვის ნოყიერი ნიადაგი იქმნება, რაც ძალიან საზიანოა ქვეყნისთვის. უსაფრთხოების საკითხებში კონსტიტუციით წახდენილი საქმის საკანონმდებლო დონეზე ოდნავ მაინც გამოსასწორებლად უსაფრთხოების საბჭოს უნდა ეწოდოს “საქართველოს პრეზიდენტისა და პრემიერ-მინისტრის სათათბირო ორგანო”, მის სხდომებს უნდა გაუძღვეს პრემიერ-მინისტრი და მოწვეული უნდა იყოს პრეზიდენტი”, - აცხადებს “შენების მოძრაობის” ლიდერი დავით უსუფაშვილი. გაზეთ “კვირის პალიტრისთვის” მიცემულ ინტერვიუში, სათაურით დავით უსუფაშვილი: “რატომ იჩივლა ხაზარაძემ ივანიშვილთან, ჩხარტიშვილი მჩაგრავსო?” / “ქართულმა ოცნებამ” რაც შეიძლება დროზე უნდა აირჩიოს სხვა პოლიტიკური განვითარების გზა, რომ ჩასაძირად გამზადებულ ნავს არ ჩაჰყვეს” / „არ გამოვრიცხავ, რომ ხაზარაძის ამბები უკავშირდებოდეს სასამართლოში არსებული პრობლემების გადაფარვას“.

“უსაფრთხოების საბჭოს საქმიანობა უნდა უზრუნველყოს მთავრობის ადმინისტრაციის სპეციალურმა ქვედანაყოფმა, რომელსაც უხელმძღვანელებს პრემიერ-მინისტრის დანიშნული საბჭოს მდივანი. ეს აუცილებელია, რადგან პრეზიდენტმა, როგორც სახელმწიფოს მეთაურმა და უმაღლესმა მთავარსარდალმა, უნდა გაიზიაროს პასუხისმგებლობა ქვეყნის უსაფრთხოებაზე, რისთვისაც უნდა ჰქონდეს შეუზღუდავი წვდომა შესაბამის ინფორმაციასა და ანალიტიკურ მასალაზე. უსაფრთხოების საბჭოს მდივანი კი უნდა იყოს პრემიერ-მინისტრის “ჩრდილი და აჩრდილი” უსაფრთხოების სტრატეგიულ საკითხებში შესაბამის სახელმწიფო ორგანოებსა და საერთაშორისო პარტნიორებთან კომპლექსურ ურთიერთობაში. ამ საქმეს ყოველდღიურად სჭირდება მაღალი რანგის პროფესიონალის 24 საათი და არა რომელიმე მინისტრის გამოძებნილი 24 წუთი. წინა საპრეზიდენტო არჩევნებიდან ერთ თვეში პრეზიდენტსა და პრემიერს შორის უკან მოუბრუნებლად გადარბენილ შავ კატას სწორედ “უშიშროების საბჭო” ეწერა ზურგზე... სწორედ უშიშროების საბჭოს უკავშირდებოდა პრემიერსა და პრეზიდენტს შორის ურთიერთობის დაძაბვა პირველ ეტაპზე, ამიტომ იმედი გამოვთქვი, რომ ეს გაკვეთილი იქნება ყველასთვის”, - აღნიშნავს გამოცემის კორესპონდენტთან საუბრისას დავით უსუფაშვილი.

“რაც შეეხება “ქართულ ოცნებაში” შიდაპარტიულ ვითარებას, საქმე გვაქვს ერთპარტიულ მმართველობასთან. საკონსტიტუციო უმრავლესობა არის პოლიტიკური მონოპოლია. მონოპოლიური მდგომარეობიდან გამომდინარე, დუმილს არჩევს მთავრობა და ამის გამო კარგავს ეფექტიანობას. რადგან ყველაფერს ვაკონტროლებო, იწყება დაუდევრობა, ფეხის ფეხზე გადადება და მხოლოდ ბოლოში აღმოაჩენენ, რომ პრობლემები შეჰქმნიათ. მერე იწყება ერთმანეთზე გადაბრალება, მერე იმის გააზრება, რომ ცუდად მიდის საქმე. ამისთვის კი ფიქრობენ, რომ კიდევ უფრო ახლოს უნდა მივიდნენ, ჩაეხუტონ და უპირობო ლოიალურობა შეჰფიცონ ლიდერს, რათა დავიწროებულ გუნდში მათი ადგილი დაინახოს. “ქართულმა ოცნებამ” რაც შეიძლება­ დროზე უნდა აირჩიოს სხვა პოლიტიკური განვითარების გზა, რომ ჩასაძირად გამზადებულ ნავს არ ჩაჰყვეს. დაიწყება უფრო მეტად ლიდერთან ჩახუტება ან ნელ-ნელა დისტანცირება, რადგან არჩევნები მოდის და იქ პოზიციონირებაა საჭირო”- განაგრძობს რესპონდენტი.

“საქართველოში პირველი მოწვევის პარლამენტის დამფუძნებელი კრების არჩევნები 100 წლის წინ, 1919 წლის 14-16 თებერვალს, პროპორციული სისტემით ჩატარდა. საქართველოს ყველა მოქალაქეს ვულოცავ ამ მნიშვნელოვან იუბილეს და ვწუხვარ, რომ გვყავს ხელისუფლება, რომელიც გვეუბნება, რომ შემდეგი პროპორციული არჩევნების ჩასატარებლად მხოლოდ 2024-ში მოვმწიფდებით. ასე რომ არ მოხდეს, “შენების მოძრაობა” აქტიურად მონაწილეობს იმ პროცესში, რომელიც დაიწყო. პარლამენტში დარეგისტრირდა ინიციატივა მოქალაქეთა ხელმოწერების შეგროვების თაობაზე, რათა პროპორციული არჩევნები 2020 წელს ჩატარდეს. ეს არ არის ვინმეს ახირება, ეს საჭიროა ქვეყნის სწორ გზაზე დასაყენებლად. აშკარაა, რომ ერთმმართველობა უნდა დასრულდეს. მხოლოდ ამის შემდეგ დაიწყება პრობლემების მოგვარება”, - დაასკვნის “შენების მოძრაობის” ლიდერი.

“მოსამართლეების დანიშვნის გამო პარტია, პრაქტიკულად, გაყოფილია. რამდენიმე ადამიანი უფრო მწვავედ აფასებს თავის კოლეგებს, ვიდრე ოპოზიცია. მათ ფორმალურად ჰქვიათ თუ არა უმრავლესობა, რა მნიშვნელობა აქვს. ივანიშვილს იმედი ჰქონდა, რომ ერთი სადავე მაინც ჰქონდა ხელთ, - ძალოვანები და ამით ყველაფერს დაალაგებდა. მიხვდა, რომ ასე არ არის, პოლიტიკური ცხოვრება გაცილებით მრავალფეროვანია და მხოლოდ უშიშროებით, პროკურატურითა და სასამართლოთი კონტროლი ვერ მყარდება. ახლა ცდილობს, რომ ყველა სადავე ხელში აიღოს, მაგრამ ამის შესაძლებლობა უკვე დაკარგული აქვს”, - მიიჩნევს უსუფაშვილი და შეკითხვაზე - “თიბისი ბანკზე” მინდა გკითხოთ. ოპოზიციის ნაწილი ფიქრობს, რომ ხაზარაძეს პოლიტიკურად დევნიან და ეს ანაკლიის პორტის საკითხს უკავშირდება”, - პასუხობს:

“სწორედ უსაფრთხოების საკითხს უკავშირდება “თიბისი ბანკის” გარშემო განვითარებული მოვლენები. ეს ძალიან მნიშვნელოვანი საქმეა და არავითარ შემთხვევაში არ უნდა დავუშვათ სადამსჯელო ქმედებები ბანკის თუ საფინანსო ინსტიტუტის მიმართ. მეორე მხრივ, ეს არ უნდა გახდეს სიმართლის დამალვის საფუძველი. ეს ძალიან მნიშვნელოვანი პრობლემაა და სრული პასუხისმგებლობით ვაცხადებ, რომ ეს არის ნასაზრდოები პოლიტიკური რევანშისა და პრევენციის მოტივით - ვიღაცამ ჩათვალა, ხაზარაძემ დამოუკიდებლად რაღაც გააკეთაო, ან შეიძლება ხაზარაძე ჩათვალეს იმ ტიპის მოქალაქედ, რომელიც თავისი ფინანსური შესაძლებლობებიდან გამომდინარე სახიფათოა, ამიტომ ის სამაგალითოდ უნდა დაისაჯოს. პრევენციაც სწორედ ეს არის, ხაზარაძის საქმე სხვებისთვისაც გზავნილია, რომ ჭკუით იყონ”.

“ეროვნულმა ბანკმა 11 წლის წინ ვერ შეამჩნია რაღაც დარღვევა და ახლა უჩერებს უფლებამოსილებას მამუკა ხაზარაძეს და ბადრი ჯაფარიძეს ბანკის სამეთვალყურეო საბჭოს ხელმძღვანელ პოსტებზე?! ეს ხომ საქმის პოლიტიკურ კონტექსტზე მიუთითებს... ადამიანს ფულის გათეთრებას აბრალებენ, მაგრამ ერთი სიტყვაც კი ვერ მოვისმინეთ, რა სქემით ათეთრებდა ფულს. ეს სერიოზულ ეჭვს ბადებს. მინდა გავიხსენო ივანიშვილის განცხადება, მან თქვა, რომ მოაგვარა ურთიერთობა ჩხარტიშვილსა და ხაზარაძეს შორის. ამ შეხვედრაზე კიდევ სხვა ცნობილი ამბები ხდებოდა, მაგალითად, რატომ მოუწია ხაზარაძეს ამ შეხვედრაზე მისვლამ... არის თემები და საკითხები, რომელიც ჩემი სათქმელი არ არის. ჩემი თქმით, საქმე უფრო გაფუჭდება. ვისი სათქმელიც არის, გამოვიდეს ის ხალხი და თქვას. ეს არ არის კერძო საქმე. ეს სერიოზული ჟურნალისტური გამოძიების საქმეა. რატომ მოუწია ხაზარაძეს ივანიშვილთან ჩივილით მისვლამ, რომ ჩხარტიშვილი ჩაგრავდა? სასამართლოში რაღაცები რომ ხდება, იმიტომ ხომ არ მივიდა?! არ გამოვრიცხავ, რომ ხაზარაძის ამბები უკავშირდებოდეს სულ სხვა რამეს, მაგალითად, სასამართლოში არსებული პრობლემების გადაფარვას. აშკარაა საზოგადოების უკმაყოფილება, ამიტომ საჭიროა ხალხის ყურადღების სულ სხვა საქმეზე გადატანა”, - დასძენს დავით უსუფაშვილი.