პარლამენტის პლენარული სხდომა 21:00 საათამდე გაგრძელდება. დეპუტატებს სხდომის გაგრძელების თაობაზე კენჭისყრის თხოვნით პარლამენტის თავმჯდომარის მოადგილემ ზვიად ძიძიგურმა მიმართა და საკითხი კენჭისყრაზე დააყენა.

პარლამენტის პლენარულ სესიაზე ცხრა დეპუტატის მიერ მომზადებული „საერთო სასამართლოების შესახებ“ კანონპროექტის განხილვა მიმდინარეობს. „საერთო სასამართლოების შესახებ“ კანონში ცვლილებები რაიონულ და სააპელაციო სასამართლოებში 2024 წლის 31 დეკემბრამდე მოსამართლეთა უვადოდ დანიშვნის შეჩერებას ითვალისწინებს. კანონპროექტს ხელს აწერენ დეპუტატები: ეკა ბესელია, ზვიად კვაჭანტირაძე, ალექსანდრე ერქვანია, გედევან ფოფხაძე, კობა ნარჩემაშვილი, ლევან გოგიჩაიშვილი, ლევან კობერიძე, დავით ჭიჭინაძე და ოთარ ჩრდილელი. ამასთან, იურიდიულ საკითხთა კომიტეტში 18 თებერვალს ცხრა დეპუტატის მიერ ინიცირებულ კანონპროექტს მხარი არ დაუჭირეს.

პარალელურად პარლამენტის თავმჯდომარე ირაკლი კობახიძე უზენაესი სასამართლოს მოსამართლეების შერჩევის კრიტერიუმების თემაზე პარლამენტში დიპლომატიური კორპუსის, არასამთავრობო ორგანიზაციებისა და სასამართლო ხელისუფლების წარმომადგენლებს ხვდება.