ზვიად კვაჭანტირაძის პოზიცია ვიცი - მითხრა, რისთვისაც არის მზად, მაგრამ მე მის ნაცვლად ვერ ვიტყვი, - ასე უპასუხა დეპუტატმა ეკა ბესელიამ უმრავლესობის შემადგენლობიდან ზვიად კვაჭანტირაძის მოსალოდნელი გასვლის თაობაზე დასმულ კითხვას.
მან აქვე დასძინა, რომ კვაჭანტირაძე 2012 წლის პირველი გვარდიის წარმომადგენელია, რასაც პროცესისათვის დიდი მნიშვნელობა აქვს.
“არ მინდა მის მაგივრად ვთქვა, ეს ეთიკური არ არის. ჩემი მეგობარი და კოლეგა თავად იტყვის, რას აპირებს და მე მის მაგივრად რომ ვთქვა, ეს ძალიან არაეთიკური იქნება. ჩვენ ერთმანეთს შევხვდით გუშინ, ასევე წინა დღეებში და ვნახოთ, როგორი იქნება მისი გადაწყვეტილება. გვქონდა კონსულტაციები - დაველოდოთ მის გადაწყვეტილებას“, - განუცხადა ჟურნალისტებს ეკა ბესელიამ.
აქვე ბესელიამ დაამატა, რომ „ძალიან საინტერესო პროცესია დაწყებულა და მოსალოდნელია პოლიტიკური ლანდშაფტის ცვლილება“.