საქართველოსა და უკრაინას შორის მიმოსვლა  დღეიდან ID  ბარათებითაა შესაძლებელი

დღეიდან საქართველოსა და უკრაინას შორის მიმოსვლა ID ბარათებითაა შესაძლებელი. როგორც ჟურნალისტებს საქართველოს საგარეო საქმეთა სამინისტროს წარმოამადგენელმა ვლადიმერ კონსტანტინიდმა განუცხადა, 2019 წლის 1-ელი მარტიდან ძალაში შედის უვიზო მიმოსვლის შესახებ შეთანხმება უკრაინისა და საქართველოს მთავრობებს შორის.

„ეს შეთანხმება ითვალისწინებს ჩვენი მოქალაქეებისთვის პირადობის ელექტრონული მოწმობებით, ე.წ. ID ბარათებით უკრაინასა და საქართველოში თავისუფლად გადაადგილებას. აღნიშნული შეთანხმება გაფორმდა გასული წლის ოქტომბერში, რომელსაც ხელი მოეწერა პრემიერ-მინისტრების დონეზე.

აღნიშნულ შეთანხმებას პრაქტიკული მნიშვნელობის გარდა აქვს სხვა დატვირთვაც. კერძოდ, ეს არის კიდევ ერთი მაგალითი და ნაბიჯი ჩვენს ქვეყნებს შორის ურთიერთობების განმტკიცების, ადამიანებს შორის კონტაქტის გაღრმავების. ორ ქვეყანას შორის უვიზო მიმოსვლა მნიშვნელოვნად შეუწყობს ხელს და გაამარტივებს ადამიანების გადაადგილებას სახელმწიფო საზღვრებზე, რაც მნიშვნელოვნად წაადგება ტურიზმის განვითარებასაც,“ - განაცხადა კონსტანტინიდმა.

საქართველოს საგარეო უწყების წარმომადგენლის თქმით, აღნიშნული შეთანხმება გულისხმობს ორ ქვეყანას შორის საჰაერო ან საზღვაო ტრანსპორტით გადაადგილების უფლებას, რაც საქართველოს მოქალაქეებმა უნდა გაითვალისწინონ.

„აქვე გასათვალისწინებელი იქნება ჩვენი მოქალაქეებისთვის, რომ აღნიშნული ითვალისწინებს „იკაოს“ სტანდარტებით ადამიანების გადაადგილებას, რაც ნიშნავს, რომ პირადობის მოწმობები უნდა იყოს „ჩიპიანი“ ანუ ელექტრონული მოწმობები და გადაადგილება გულისმობს საერთაშორისო საჰაერო ფრენით გადაადგილებას ან საზღვაო გზით. ეს ორი აუცილებელი პირობაა, რომელიც უნდა გაითვალისწინონ ჩვენმა მოქალაქეებმა,“ - აღნიშნა ვლადიმერ კონსტანტინიდმა.

თავის მხრივ, საქართველო-უკრაინას შორის ID ბარათებით გადაადგილების საკითხზე განცხადებას ავრცელებს უკრაინის საგარეო უწყება.

„2019 წლის 1-ელ მარტს ძალაში შედის უკრაინის მინისტრთა კაბინეტსა და საქართველოს მთავრობას შორის განახლებული შეთანხმება სავიზო მოთხოვნების ურთიერთგაუქმების შესახებ და უვიზო რეჟიმთან ერთად შემოღებულია უკრაინისა და საქართველოს მოქალაქეების პირადობის დამადასტურებელი ბიომეტრიული მოწმობებით (ID ბარათებით) მიმოსვლა“, - ნათქვამია უკრაინის საგარეო უწყების განცხადებაში.

იხილეთ ვიდეო: საქართველოსა და უკრაინას შორის მიმოსვლა დღეიდან ID ბარათებითაა შესაძლებელი

რამაზ საყვარელიძე - პროპორციული საარჩევნო სისტემა კიდევ უფრო მარცხიანს გახდის ოპოზიციის მდგომარეობას
ქართული პრესის მიმოხილვა 05.06.2020
თედო ჯაფარიძე - არ მგონია, რომ ამერიკის "დასუსტებით" რუსეთმა ან რომელიმე სხვა ქვეყანამ საკუთარი პოზიციები გაიმაგროს
მითები და რეალობა ჰესების შესახებ
გიორგი რამიშვილის პრესსამსახური განცხადებას ავრცელებს
ლიბერთის მობაილ ბანკით სარგებლობა უკვე მობილური ინტერნეტის გარეშეც შესაძლებელია
ფინკა ბანკისა და სიმბიოტიკსის თანამშრომლობა მეწარმეების დაკრედიტების მიმართულებით გრძელდება
„ვისოლში“ საწვავზე წლის მიმდინარე პერიოდში რეკორდულად დაბალი ფასები დაფიქსირდა