გარემოს დაცვისა და სოფლის მეურნეობის სამინისტროს თანამშრომლებმა ტრენინგი გამართეს
გარემოს დაცვისა და სოფლის მეურნეობის სამინისტროს სსიპ გარემოსდაცვითი ინფორმაციისა და განათლების ცენტრის თანამშრომლებმა სკოლამდელი გარემოსდაცვითი განათლების ხელშეწყობის მიზნით, ახალციხის, ადიგენისა და ბორჯომის მუნიციპალიტეტების სკოლამდელი აღზრდის დაწესებულებების აღმზრდელ-პედაგოგებისა და მეთოდისტებისთვის ტრენინგები გამართეს.
ამის შესახებ „ინტერპრესნიუსს“ საქართველოს გარემოს დაცვისა და სოფლის მეურნეობის სამინისტროდან აცნობეს. მათივე ინფორმაციით, ტრენინგს ახალციხის მუნიციპალიტეტის მერის მოადგილე გურამ მელიქიძე და გარემოსდაცვითი ინფორმაციისა და განათლების ცენტრის წარმომადგენელი ნიკოლოზ ტურაშვილი დაესწრნენ. ცენტრის წარმომადგენელი მონაწილეებს გარემოსდაცვითი განათლების მნიშვნელობასა და მასში სკოლამდელი აღზრდის დაწესებულებების მნიშვნელობაზე ესაუბრა.
სახელმძღვანელო “სკოლამდელი გარემოსდაცვითი განათლება” სასკოლო მზაობის პროგრამის ფარგლებში შემუშავდა, რომელიც ასაკისათვის შესაფერის თეორიულ მასალასთან ერთად პრაქტიკულ სავარჯიშოებს მოიცავს და სამ გარემოსდაცვით თემას აერთიანებს: ბიომრავალფეროვნება ჩვენ გარშემო, წყლისა და ენერგიის დაზოგვა, ნარჩენების მართვა. სახელმძღვანელო თბილისის მუნიციპალიტეტში და კახეთის, გურიის, მცხეთა-მთიანეთის, შიდა ქართლისა და ქვემო ქართლის მხარეებში უკვე დაინერგა და ამჟამად პროცესი სამცხე-ჯავახეთში მიმდინარეობს.
2019 წლის ბოლომდე “სკოლამდელი გარემოსდაცვითი განათლების” სახელმძღვანელო მთელი ქვეყნის მასშტაბით დაინერგება.
