ტყიბულის მუნიციპალიტეტის სოფელ გელათის დასახლების მცხოვრებლებმა რამდენიმე წუთით ქუთაისი-ტყიბულის დამაკავშირებელი გზა გადაკეტეს. აქციის მონაწილეები მათი დასახლების სოფელ კურსებისთვის მიკუთვნებას აპროტესტებენ.

მოსახლეობის თქმით, 2013 წლიდან ეს ტერიტორია სოფელ კურსებს მიაკუთვნეს, რამაც პრობლემები შეუქმნა მოსახლეობას საჯარო რეესტრში დოკუმენტების დამზადებისას. აქციის მონაწილეები ასევე აცხადებენ, რომ შემცირდა უძრავი ქონების ღირებულება. აქციის მონაწილეთა თქმით, წლების განმავლობაში, არაერთხელ მიმართეს ტყიბულის მერიას და საკრებულოს, თუმცა უშედეგოდ. სოფლის მცხოვრებლები აცხადებენ, რომ თუკი დროულად არ მოგვარდება ეს პრობლემა, პერმანენტულ აქციებს დაიწყებენ.