პროკურორი - ბრალდებულებმა პირადი ცხოვრების ამსახველ ფარულ ვიდეოჩანაწერთან დაკავშირებით აღიარებითი ჩვენება მისცეს

ბრალდებულმა პირებმა, პირადი ცხოვრების ამსახველი ფარული ვიდეოჩანაწერის მოპოვებასთან, შენახვასთან და გავრცელებასთან დაკავშირებით გამოძიებას ინფორმაცია მიაწოდეს, მათ საგამოძიებო უწყებას ასევე აღიარებითი ჩვენება მისცეს, - ამის შესახებ ჟურნალისტებს საქმის პროკურორმა, გიორგი მუკბანიანმა განუცხადა.

როგორც პროკურორი განმარტავს, დღეს გათავისუფლებულმა ოთხმა პირმა დაკითხვისას გამოძიებას მნიშვნელოვანი ინფორმაცია მიაწოდა. მუკბანიანის თქმითვე, შემცირდა ის რისკები, რაც საფუძვლად დაედო აღკვეთის ღონისძიების სახით პატიმრობის გამოყენებას, რის გამოც, მათ სასამართლოს ბრალდებულების გირაოს სანაცვლოდ გათავისუფლების შუამდგომლობით მიმართეს.

„გამოძიებამ აღნიშნული ბრალდებულები დაკითხა, რომლებმაც გამოძიებას არსებითი ინფორმაცია მიაწოდეს დანაშაულებრივ ქმედებასთან დაკავშირებით, კერძოდ, მათ მიერ ვიდეოჩანაწერის მოპოვება-შენახვა-გავრცელებასთან დაკავშირებით. მოცემულ შემთხვევაში, ბრალდების მხარემ მიიჩნია, რომ აღნიშნული ინფორმაცია მნიშვნელოვანია გამოძიებისათვის, მცირდება ის რისკები, რაც საფუძვლად დაედო აღკვეთის ღონისძიების სახით პატიმრობის გამოყენებას. შესაბამისად, შუამდგომლობით მივმართეთ საქალაქო სასამართლოს რათა, ბრალდებულების მიმართ პატიმრობის ნაცვლად, გირაო გამოყენებულიყო. ბრალდებულების მხრიდან მოხდა აღიარება, ასევე ინფორმაციის მიწოდება ვიდეოების მოპოვებასთან, შენახვასთან და გავრცელებასთან დაკავშირებით“, - განაცხადა მუკბანიანმა.

თუ საიდან მოიპოვეს აღნიშნულმა პირებმა პირადი ცხოვრების ამსახველი ფარული ვიდეოჩანაწერი, პროკურორი არ აკონკრეტებს.

„აღნიშნული ინფორმაცია გამოძიებისათვის მნიშვნელოვანია და ფართო მასებისთვის გასაჟღერებლად თავს შევიკავებთ. მიგვაჩნია, რომ მოცემული ინფორმაცია არსებითი იქნება და ხელს შეუწყობს სხვა გარემოებების დადგენას“, - განაცხადა მუკბანიანმა.

სამართალდამცავებმა პირადი ცხოვრების ამსახველი ვიდეოჩანაწერის გავრცელების ფაქტზე ჩატარებული ოპერატიულ-საგამოძიებო მოქმედებების შედეგად, ვიდეოჩანაწერის შენახვის და გავრცელების ბრალდებით, 18 პირი დააკავეს. მათგან თავდაპირველად,14 პირს აღკვეთის ღონისძიების სახით გირაო შეეფარდათ, 4 პირს კი, პატიმრობა. სწორედ აღნიშნული პირები გათავისუფლდნენ დღეს გირაოს სანაცვლოდ.

ყველა მათგანს ბრალი საქართველოს სისხლის სამართლის კოდექსის 157-ე პრიმა მუხლის პირველი და მეორე ნაწილებით აქვთ წარდგენილი.

გამოძიების ინფორმაციით, დადგინდა, რომ აღნიშნული პირები სოციალური ქსელის და მობილური ინტერნეტაპლიკაციის მეშვეობით ინახავდნენ და მასობრივად ავრცელებდნენ პირადი ცხოვრების ამსახველ ვიდეოჩანაწერს.

ანდრო გოცირიძე - პოლიტიკური სარგებლის მიღების მიზნით, მმართველი პარტია არ ერიდება მოსახლეობის დაპირისპირებას, პოლარიზაციის გაღვივებას და აღვირახსნილ ანტიდასავლურ კამპანიასაც კი
მამუკა ხაზარაძე - ცვლილებების დროა! ხელისუფლება, რომელიც ემსახურება რუსეთს, უნდა დასრულდეს! „ლელო“ ემსახურება საქართველოს!
ქართული პრესის მიმოხილვა 28.03.2024
„გავერთიანდეთ ჩვენი გმირებისთვის“ - სილქნეტი დაჭრილ მებრძოლთა თანადგომის ფონდის საქმიანობის ანგარიშს აქვეყნებს
საქართველოს უნივერსიტეტი -  iOS LAB Apple ავტორიზებული სასწავლო ცენტრი
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს