თურქეთში, სადაც დღეს მუნიციპალური არჩევნები მიმდინარეობს, ერთ-ერთ საარჩევნო უბანზე ორი ადამიანი დაცხრილეს. „დოიჩე ველეს“ ინფორმაციით, აღმოსავლეთ თურქეთის ქალაქ მალათიაში ორი დაჯგუფების შეტაკება მოხდა. შეხლა-შემოხლის დროს, ერთ-ერთმა პირმა პისტოლეტით თავისი მოწინააღმდეგეები მოკლა. დამნაშავე ამ დროისთვის უკვე დაკავებულია.
ოპოზიციური პარტია „კეთილდღეობის“ ლიდერმა თემელ კარამოლაოღლუმ „ტვიტერის“ პირად გვერდზე დაწერა, რომ გარდაცვლილები არიან დამკვირვებლები, რომლებიც მისი პარტიის წევრები იყვნენ.
მისივე ცნობით, მოკლული პირები ცდილობდნენ ხელი შეეშალათ ღიად ხმის მიცემას, რის გამოც მოკლეს.
თურქეთში 57 მილიონი ამომრჩეველი ქვეყნის 81-ვე პროვინციაში მერებს, საზოგადოებრივ საბჭოებსა და სხვა მუნიციპალურ პოლიტიკოსებს ირჩევენ.
ქვეყნის მასშტაბით უსაფრთხოებას დაახლოებით ნახევარი მილიონი სამართალდამცავი იცავს.