თავდაცვის მინისტრის ლევან იზორიას პარლამენტში გამოსვლის ერთ-ერთი მნიშვნელოვანი თემა სამხედრო მოსამსახურეებისა და მათი ოჯახების სოციალური უზრუნველყოფა იქნება.

ლევან იზორია ამ მიმართულებით განხორციელებულ ინიციატივებსა და პროგრამებზე ისაუბრებს, რაც არის სახელფასო ანაზღაურების ზრდა, სამხედრო მოსამსახურეების ბინებით უზრუნველყოფა, დაჭრილ და დაშავებულ სამხედრო მოსამსახურეებზე ზრუნვა, რეაბილიტაცია და რესოციალიზაცია და სხვა.

თავდაცვის სამინისტროს პრესსამსახურის ინფორმაციით, 2016-2020 წლებში, სახელფასო ანაზღაურების ზრდა საქართველოს თავდაცვის სამინისტროსა და თავდაცვის ძალებში 11 264 დასაქმებულ პირს მოიცავს. მათივე ცნობით, 2013 წელს დაიწყო და დღემდე, 1 634 ოჯახის ბინით უზრუნველყოფა მოხდა.

როგორც უწყებაში აცხადებენ, 2020 წელს თავდაცვის სამინისტრო საკონტრაქტო სამხედრო მოსამსახურეების წინაშე 2007 წელს ხელშეკრულებით ნაკისრ ვალდებულებას სრულად შეასრულებს.