საქართველოს კონკურენციის სააგენტოს თავმჯდომარე, ნოდარ ხადური ბუქარესტში, რუმინეთის კონკურენციის საბჭოს და რუმინეთის მომხმარებელთა უფლებების დაცვის უწყების ორგანიზებით გამართულ ევროპის მომხმარებელთა და კონკურენციის დღისადმი მიძღვნილ საერთაშორისო კონფერენციაში მონაწილეობს. ამის შესახებ „ინტერპრესნიუსს“ კონკურენციის სააგენტოდან აცნობეს.
მათი ინფორმაციით, ღონისძიება ევროკავშირში რუმინეთის პრეზიდენტობის ფარგლებში იმართება, სადაც ასევე მონაწილეობენ: ევროკომისარი კონკურენციის საკითხებში, მარგარეტ ვესტაგერი; ევროკომისარი იუსტიციის, მომხმარებელთა და გენდერული თანასწორობის საკითხებში, ვერა იუროვა და ევროპის სხვადასხვა ქვეყნის კონკურენციისა და მომხმარებელთა უფლებების დაცვის უწყებების ხელმძღვანელები.
„კონფერენციას ასევე ესწრებიან: საქართველოს კონკურენციის სააგენტოს თავმჯდომარის პირველი მოადგილე, დავით ჭიჭინაძე, ევროკავშირის პროექტის „საქართველოს კონკურენციის სააგენტოს მხარდაჭერა“ გუნდის ხელმძღვანელი, აურელიო ლა ტორე, ასევე ევროპის კონკურენციის ქსელის წევრები, მომხმარებელთა უფლებების დაცვის ასოციაციების, არასამთავრობო ორგანიზაციების, აკადემიური წრეების წარმომადგენლები, იურისტები, მოსამართლეები და ა.შ.
მხარეებს შორის გაფორმებული ურთიერთთანამშრომლობის მემორანდუმის ფარგლებში, საქართველოს კონკურენციის სააგენტოს თავმჯდომარე, ნოდარ ხადური რუმინეთის კონკურენციის საბჭოს პრეზიდენტ ბოგდან მარიუს ჩირიტოიუს და საბჭოს წევრებს შეხვდა.
სამუშაო ვიზიტი ევროკავშირის პროექტის „საქართველოს კონკურენციის სააგენტოს მხარდაჭერა“ ფარგლებში ხორციელდება“, - აღნიშნულია საქართველოს კონკურენციის სააგენტოს მიერ გავრცელებულ ინფორმაციაში.