ეროვნული ბანკის პრეზიდენტმა კობა გვენეტაძემ წარმოადგინა ფაქტები და უფრო ნათელი გახდა რა ხდებოდა "თიბისი ბანკის", ბადრი ჯაფარიძის და მამუკა ხაზარაძის გარშემო, - ამის შესახებ ჟურნალისტებს "ქართული ოცნების" წევრმა, დეპუტატმა ირაკლი მეზურნიშვილმა განუცხადა.

დეპუტატის შეფასებით, ეროვნული ბანკის პრეზიდენტის გამოსვლა ნაყოფიერი იყო, ვინაიდან მან ყველა იმ კითხვას ამომწურავი პასუხი გასცა, რაც დეპუტატების მხრიდან დაისვა.

„კობა გვენეტაძის გამოსვლა საინტერესო იყო, რადგან მას ჰქონდა ფაქტები. ფაქტები, რომლის გაცნობის შემდეგ უფრო ნათლად დავინახეთ ის სურათი, რაც იყო ჯაფარიძის, ხაზარაძის თუ "თიბისი ბანკის" გარშემო. დეპუტატებს არაერთი შეკითხვა გვქონდა, რომელზეც ამომწურავი პასუხები მივიღეთ", - აღნიშნა ირაკლი მეზურნიშვილმა.

შგახსენებთ, რომ დღეს პარლამენტის რიგგარეშე სხდომა გაიმართება. რიგგარეშე სხდომაზე ეროვნული ბანკის პრეზიდენტის კობა გვენეტაძის მოსმენა გაგრძელდება, რომელიც “თიბისი ბანკისა“ და ახალი საბანკო რეგულაციების თაობაზე პარლამენტის წინაშე 5 აპრილის პლენარულ სხდომაზე წარსდგა, თუმცა მოსმენის დასრულება ვერ მოესწრო.

კობა გვენეტაძესთან დეპუტატებს შეკითხვები „თიბისი ბანკის“ გარშემო მიმდინარე მოვლენებისა და ახალი საბანკო რეგულაციების შედეგებთან დაკავშირებით აქვთ.