ვერეს ხეობის მიმდებარე ტერიტორიის დასუფთავება დაიწყო

ვაკის რაიონში, თამარაშვილის ქუჩიდან ახალი გზის მიმართულებით, ვერეს ხეობაში მოსახლეობის მიერ დანაგვიანებული ფერდობებისა და მიმდებარე ტერიტორიის დასუფთავება დაიწყო. დანაგვიანების რაოდენობიდან გამომდინარე, დასუფთავებითი სამუშაოები რამდენიმე დღე გაგრძელდება.

აქციაში „თბილსერვის ჯგუფის“ ოცდაათამდე თანამშრომელია ჩართული, ასევე ადგილზე მობილიზებულია სპეციალური ტექნიკა.

თბილისის მერის, კახი კალაძის თქმით, მსგავსი სამუშაოები, თბილისის შემოსასვლელ- გასასვლელშიც ჩატარდება.

„გაწმენდით სამუშაოებს რამდენიმე დღე დაჭირდება, რომ მთლიანად გასუფთავდეს ეს ტერიტორია. დაბინძურების მასა დიდია. ცოტა რთული სამუშაოა, მაგრამ „თბილსერვისი“ ყველაფერს გააკეთებს, რომ მოწესრიგდეს ეს ხეობა. შემდეგ უკვე გადავდივართ თბილისის შემოსასვლელ-გასასვლელში, სადაც ასევე არცთუ ისე კარგი მდგომარეობაა სისუფთავის მხრივ და იქაც ყველაფერი მოწესრიგდება“, - განაცხადა კახა კალაძემ.

თავის მხრივ, „თბილსერვის ჯგუფის“ ხელმძღვანელმა ლევან ჯღარკავამ ჟურნალისტებთან საუბრისას განაცხადა, რომ აღნიშნული ტიპის დანაგვიანებაზე ჯარიმები არსებობს, რომელსაც მერია გამოიყენებს.

„ვიმყოფებით მდინარე ვერეს ხეობის მიმდებარე ტერიტორიაზე, სადაც ძალიან დიდი რაოდენობით არის სამშენებლო ნარჩენი, ბუნებრივია, ეს არის მოსახლეობის მიერ დაყრილი. მოვუწოდებ მოსახლეობას, რომ თავი შეიკავონ მსგავსი ქმედებებისგან. ჩვენ გვაქვს სპეციალური ნაგავსაყრელი სამშენებლო ნარჩენებისთვის და აუცილებლად უნდა მიმართონ ამ ნაგავსაყრელს. რა თქმა უნდა, არის ასეთი ტიპის დანაგვიანებაზე ჯარიმები, იქნება გამოყენებული არსებული სანქციები. როგორც ხედავთ, რელიეფი არის ძალიან რთული, ამიტომ ჩვენ გვყავს მობილიზებული მთამსვლელები, რომლებიც სპეციალურად აღჭურვილები არიან და დაცულია მათი უსაფრთხოება. 3 დღე დასჭირდება ამ კონკრეტული ლოკაციის გაწმენდას“, - განაცხადა ჯღარკავამ.

ცნობისთვის, ვერეს ხეობის დასუფთავების დავალება დედაქალაქის მერმა მუნიციპალიტეტის მთავრობის სხდომაზე წინა კვირას გასცა. როგორც კახა კალაძემ აღნიშნა, ასევე, საჭიროა თბილისის შემოსასვლელის და გასასვლელის დასუფთავება.

ზვიად კირტავა - მთავარი მიზანი მაინც არის ინფიცირების ჯაჭვის გაწყვეტა და შემთხვევების შემცირება, ამის მიღწევის გარეშე საწოლების და პერსონალის კიდევ გაზრდაც ვერ აგვაცილებს ჯანდაცვის სისტემის გადატვირთვას
ქართული პრესის მიმოხილვა 04.12.2020
ვანო მაჭავარიანი - თუ ხელისუფლება და ოპოზიცია კოალიციური მმართველობის რაღაც ფორმაზე არ შეთანხმდნენ, ეს საქართველოსთვის უკეთესი პერსპექტივის ხელიდან გაშვებული შესაძლებლობა იქნება
საახალწლო შეთავაზება მრავალფუნქციური კომპლექსისგან "მოედანი"
ზოომარტი ექსკლუზიურად Wolt-ზე
თანამედროვე, მარტივი და უსაფრთხო ახალი ინტერნეტბანკინგი "პროკრედიტ ბანკის" მომხმარებლებისთვის