თბილისის აეროპორტში არადეკლარირებული ვერცხლის ნაკეთობები აღმოაჩინეს

ფინანსთა სამინისტროს შემოსავლების სამსახურის მებაჟე ოფიცრებმა, საბაჟო გამშვებ პუნქტში ,,თბილისის აეროპორტი“ არადეკლარირებული ვერცხლის ნაკეთობები აღმოაჩინეს. როგორც „ინტერპრესნიუსს“ შემოსავლების სამსახურის პრესსამსახურიდან აცნობეს, მებაჟე ოფიცრებმა 7,768.58 ლარის ღირებულების არადეკლარირებული ვერცხლის ნაკეთობები (წონა 6,3 კგ.),ეჭვის საფუძველზე, აზერბაიჯანის მოქალაქის ლ.მ-ს კუთვნილი ხელბარგის დათვალიერების შედეგად გამოავლინეს.

საგადასახადო კოდექსის 289-ე მუხლის მე-10 ნაწილის შესაბამისად, სამართალდამრღვევ მოქალაქეს, სანქციის სახით, ფულადი ჯარიმა, 7,768.58 ლარის ოდენობით შეეფარდა.