ყველაფერს ვაკეთებთ, რომ ლიბიაში მყოფი ქართველი მეზღვაურები დავიხსნათ, - ამის შესახებ საგარეო საქმეთა მინისტრმა დავით ზალკალიანმა, ლიბიაში მყოფ ქართველ მეზღვაურებზე საუბრისას განაცხადა.
„ჩვენ 24-საათიან რეჟიმში ვმუშაობთ. გუშინ გვქონდა შეხვედრა მათი ოჯახის წევრებთან. იქ საომარი მოქმედებაა, ძალიან რთულია საომარი მოქმედების დროს მოახდინო სწრაფი და დროული რეაგირება, მაგრამ მიუხედავად ამისა, ჩვენ მუდმივ კონტაქტში ვართ. ლიბიაში არის დროებითი მმართველი და არის ასევე ის ოპოზიციური ძალა, რომელიც თავდასხმას ახორციელებს ლიბიის დედაქალაქზე, მაგრამ ჩვენ ყველაფერს ვაკეთებთ, ვიყენებთ სხვა ქვეყნებს ვისაც აქვთ იქ წარმომადგენლობა, რომ დავიხსნათ ეს ადამიანები",- განაცხადა ზალკალიანმა.
ლიბიაში მყოფი ქართველი მეზღვაურების, რაულ ტაკიძის და მანუჩარ კეკელიძის ოჯახის წევრების განცხადებით, ლიბიაში დავით რაზმაძის გარდაცვალების შემდეგ, რაულ ტაკიძე და მანუჩარ კეკელიძე რამდენიმე თვეა ყოველდღიურად დაკითხვაზე იმყოფებიან და ქვეყნის დატოვების უფლებას ლიბიის ხელისუფლება არ აძლევს.