თემქაზე 20 წლის ანა ნაცვლიშვილის მკვლელობის საქმეზე მსჯავრდებული ლადო გრიგალაშვილის საქმეზე სასამართლო პროცესი დღეს გაიმართება.

სხდომა თბილისის სააპელაციო სასამართლოში 14:00 საათზე ჩატარდება.

დღევანდელი პროცესი დაცვის მხარის შესავალი სიტყვით გაგრძელდება.

სასამართლო პროცესებს თავად მსჯავრდებულიც დაესწრება.

საქმე ეხება 2018 წლის 22 თებერვალს, განსაკუთრებული სისასტიკით ანა ნაცვლიშვილის მკვლელობას. გამოძიების ინფორმაციით, ლადო გრიგალაშვილმა ანა ნაცვლიშვილი სახლიდან გაიყვანა და დანით 33 ჭრილობა მიაყენა. თავისა და კისრის არეში მიყენებული სასიკვდილო ჭრილობებით ანა ნაცვლიშვილი ადგილზე გარდაიცვალა.

აღნიშნულ საქმეზე თბილისის საქალაქო სასამართლომ ლადო გრიგალაშვილს უვადო პატიმრობა შეუფარდა. სწორედ აღნიშნული გადაწყვეტილება გაასაჩივრა დაცვის მხარემ. გრიგალაშვილი ბრალს არ აღიარებს.