საკრებულოს უმრავლესობის წევრის ბექა დავითულიანის განცხადებით, ვახტანგ შაქარიშვილისა და ჯაბა ჯიშკარიანის მიერ უმრავლესობის დატოვების გადაწყვეტილება მოულოდნელი და ახალი არავისთვის ყოფილა.

„მათ მიიღეს ეს გადაწყვეტილება, რაც მიიღეს. თავიანთ მომავალ პოლიტიკურ აქტიურობას უკავშირებენ სხვა ორგანიზაციას, რომელსაც, თავის მხრივ, დეკლარირებული აქვს თავისი პოლიტიკური მიზნები და ამოცანები. შესაბამისად, მიიღეს გადაწყვეტილება, რომელიც, როგორც თვითონ მიაჩნიათ, მათ პოლიტიკურ მომავალს სჭირდება", - განაცხადა დავითულიანმა.

კითხვაზე, თავად იზიარებს თუ არა იმას, რომ დეპუტატების საკრებულოს დატოვების მიზეზი სასამართლო სისტემის ირგვლივ განვითარებული მოვლენები გახდა, დავითულიანმა უპასუხა, რომ ეს მხოლოდ საბაბი იყო.

„მათ სხვა პოლიტიკურ ორგანიზაციასთან შეერთება დააანონსეს. შესაბამისად, შეუთავსებლობა ექნებოდათ მათ აქამდე არსებულ პოლიტიკურ ორგანიზაციასთან.

სასამართლოს თემაზე იყო განხილვა საპარლამენტო უმრავლესობის ფორმატში. პარტიის თავმჯდომარემაც ამაზე განცხადება გააკეთა. შეთავაზებული იყო რისკებისგან თავის დაზღვევის ყველა მოდელი და მექანიზმი. ამის მიუხედავად, უკვე ყოფილი უმრავლესობის გარკვეულ ჯგუფს ეს პასუხები არ აკმაყოფილებდა და მიიღეს ეს გადაწყვეტილება. მიუხედავად იმისა, რომ როგორც უკვე არაერთხელ აღინიშნა, არგუმენტირებული საბაბი და მიზეზი არ იყო“, - განაცხადა დავითულიანმა.

მისივე განცხადებით, საკრებულოში უმრავლესობას დაშლის საფრთხე არ ემუქრება. „ვისაც გადაწყვეტილების მიღება სურდა, მიიღო“, - განაცხადა დავითულიანმა.

შეგახსენებთ, თბილისის საკრებულოს უმრავლესობის დეპუტატებმა ვახტანგ შაქარიშვილმა და ჯაბა ჯიშკარიანმა პარტია „ქართული ოცნების“ დატოვების შესახებ დღეს განაცხადეს.