ვინც ბიძინა ივანიშვილის ინტერვიუ მოისმინა, რომელსაც შეიძლება ვუწოდოთ „შეგროვებული დარდების კრებული“, ყველა დარწმუნდება, რომ მისთვის სტრატეგიული მნიშვნელობა აქვს სასამართლო სისტემის დღევანდელ მდგომარეობაში შენარჩუნებას, - ამის შესახებ ფრაქცია „ნაციონალური მოძრაობის" თავმჯდომარემ რომან გოცირიძემ სასამართლო სისტემასთან დაკავშირებით დასმულ კითხვაზე პასუხად განაცხადა.
რომან გოცირიძის თქმით, სასამართლო სისტემის გაჯანსაღება ხელისუფლების შეცვლის გარეშე შეუძლებელია.
„ნუ მივეცემით ილუზიებს, გამორიცხულია, რომ ნებისმიერი სახის ალტერნატივა, თუნდაც ვენეციის კომისიის შენიშვნები იყოს ნებისმიერი სახით გათვალისწინებული საპრლამენტო უმრავლესობის მიერ. მიიღებენ იმ კანონს, რომელიც მოემსახურება მათი ძალაუფლების გაძლიერებას და დანიშნავენ იმ მოსამართლეებს, რომლებიც უკვე იყო ასე სკანდალურად დაწუნებული საზოგადოების, მთელ არასამთავრობო, პოლიტიკური სექტორის მიერ. ეს არის ჯიუტად საზოგადოებრივი აზრის წინააღმდეგ ხელის გადაგრეხვით პარლამენტში საკუთარი ინტერესების გატანის მცდელობა. ერთადერთი გამოსავალი არის კიდევ უფრო დიდი პროტესტი. ხელისუფლების შეცვლის გარეშე სასამართლო სისტემის გაჯანსაღება არის შეუძლებელი, - განაცხადა რომან გოცირიძემ.
პარლამენტის იურიდიულ საკითხთა კომიტეტი დღეს უზენაესი სასამართლოს მოსამართლეობის კანდიდატების შერჩევის წესთან დაკავშირებით დეპუტატ ეკა ბესელიას მიერ მომზადებული პროექტს განიხილავს.