გუკა რჩეულიშვილი - სამ ინვესტორთან შეთანხმება მიღწეულია და ახლა ჯერი სახელმწიფოზეა - თუ ჩიხში შევალთ, დაზარალებულები უსახლკაროდ დარჩებიან, ჩვენ - ციხეში

მაია რჩეულიშვილისთვის პატიმრობის ვადის გაზრდა ყველანაირ აზრს და ლოგიკას იყო მოკლებული. 7 წელს არ ველოდი, ეს ჩემთვის აბსოლუტურად მოულოდნელი იყო, - ასე შეაფასა "ინტერპრესნიუსთან" "ცენტრ პოინტ ჯგუფის" სამეთავალყურეო საბჭოს თავმჯდომარე გურამ რჩეულიშვილმა სასამართლოს გუშინდელი გადაწყვეტილება, რომლის მიხედვითაც, დედამისს, მაია რჩეულიშვილს 7 წლით თავისუფლების აღკვეთა შეეფარდა.

როგორც რჩეულიშვილი აცხადებს, მისთვის სასამართლოს მიერ გამოტანილი გამამტყუნებელი განაჩენი მოულოდნელი არ ყოფილა, თუმცა, მოულოდნელი იყო სასჯელის ზომა.

"ველოდით, რომ მოსამართლე გამამტყუნებელ განაჩენს გამოიტანდა, რადგან სტერეოტიპებით და კლიშეებით უფრო მიმდინარეობს ჩვენი პროცესი, ვიდრე რეალური შეფასებით. არ ველოდი 7 წელს, ეს ჩემთვის აბსოლუტურად მოულოდნელი იყო. ეს ცუდი ნიშანი არის მომავალი ინვესტორებისთვისაც და თუნდაც, დაზარალებულებისთვის. სამართლებრივად მაიას პატიმრობის ვადის გაზრდა ყველანაირ აზრს და ლოგიკას იყო მოკლებული. 7 წელი ციხეში თუ გააჩერეს, 7 წლის მერე იმ ხალხთან არანაირი ვალდებულება არ ექნება და ის ხალხი საბოლოოდ, მაინც დაზრალებული დარჩება", - აცხადებს რჩეულიშვილი.

მისი განმარტებით, "ცენტრ პოინტ ჯგუფმა" სამ ინვესტორთან შეთანხმებას მიაღწია, მოლაპარაკებები დასრულდა და ახლა უკვე ყველაფერი სახელმწიფოზეა. როგორც რჩეულიშვილი აცხადებს, ინვესტორებმა მას გადაწყვეტილებების მისაღებად ერთთვიანი ვადა მისცეს.

"პროცესი, რომელიც დღეს უნდა ჩატარებულიყო, ერთი თვით გადაიდო, ეს ერთთვიანი ვადა მე ავიღე, რადგან სამივე ინსვესტორი, რომელიც ამ წუთას სხვადახვა ობიექტზე შემოდის, უკვე სამი თვეა, ელოდება გადაწყვეტილებას, რომელიც სახელმწიფოსთან ერთად უნდა იქნა მიღებული. ამ ბიზნესმენებმა ერთთვიანი ვადა მომცეს, დაახლოებით, 50 მილიონ ლარზეა ლაპარაკი. ერთ თვეზე მეტს ამ ფულს ვერ გააჩერებენ, მათაც თავიანთი ბიზნესები აქვთ. ამ ერთთვიან ვადაში, თუ ჩვენ სახელმწიფოსთან ვერ მოვილაპარაკეთ, სამწუხაროდ, ყველაფერი ჩაიშლება და დავბრუნდებით ნულოვან წერტილზე და ჩიხში მოვხვდებით. ეს ერთი თვე არის გადამწყვეტი. ჩვენი მხრიდან ყველაფერი მზადაა, საბოლოო შეხვედრები ალბათ, იქით კვირაში გვექნება. სახელმწიფო სამართლებრივი კუთხით უნდა დაგვეხმაროს, ყადაღებია მოსახსნელი, ასევე უნდა დაგვეხმაროს მერიაც. საკმაოდ დიდი დრო აქვს მთავრობას - ერთი თვე, იმისთვის, რომ ყველაფერი დაზარალებულების, ანუ სამივე მხარის სასიკეთოდ გადაწყვიტოს. იმედია, ყველაფერი კარგად დასრულდება. ასე თუ არ მოხდა, ამის შემდეგ, ისეთ ჩიხში შევალთ, დაზარალებულები უსახლკაროდ დარჩებიან, ჩვენ - ციხეში. არ მგონია, ეს ვინმესთვის რამის მომტანი იყოს", - აცხადებს რჩეულიშვილი.

თამარ გაბუნია - ეპიდემიის გავრცელების მაჩვენებელი ჯერ კონტროლის ფარგლებში რჩება, თუმცა გარკვეული შერბილებების შემდეგ, რაღაცნაირად მოვდუნდით
ზვიად კირტავა - მთავარია, ყველა მოქალაქემ გააცნობიეროს - თუ სწორად მოექცევა ჯანმრთელობას, სამუშაოს და ბიზნესსაც შეინარჩუნებს, თუ წესებს დაივიწყებს, ყველას და ყველაფერს რისკის ქვეშ დააყენებს
ქართული პრესის მიმოხილვა 01.06.2020
"დიჯიტალ ტვ" საიუბილეო აქციას იწყებს
„დრესაპ ჯგუფის“ მაღაზიები გაიხსნა