მსოფლიო ეკონომიკური ფორუმის ახალგაზრდა ლიდერები საქართველოში სტუმრად იმყოფებიან. ვიზიტის ფარგლებში, სასტუმრო „რუმსში“ ფორუმი მიმდინარეობს.
4- დღიანი ვიზიტის ფარგლებში, მსოფლიო ლიდერები საქართველოში ბიზნეს გარემოს და ქართულ კულტურას ეცნობიან.
„საქართველოს ფერმერთა ასოციაციის“ ხელმძღვანელის ნინო ზამბახიძის თქმით, ვიზიტის ფარგლებში გაიმართება პანელური დისკუსიები და მსოფლიო ლიდერები ოკუპაციის ზოლზე მცხოვრებ მოსახლეობასაც შეხვდებიან.
„მნიშვნელოვანია, რომ დღეს ვმასპინძლობთ მსოფლიო ეკონომიკური ფორუმის პლატფორმის მქონე ახალგაზრდა გლობალურ ლიდერებს პროექტით „შეიცანი საქართველო მისი საზოგადოებით, მისი ღირებულებით და მისი კულტურით“. მნიშვნელოვანი იყო, რომ მსოფლიო ლიდერები, რომლებიც ჩამოსულები არიან, დღეს პირველად იმყოფებიან საქართველოში. შევეცადეთ, რომ დაგვეორგანიზებინა ყველა შეხვედრა, როგორც ხელისუფლებასთან და არასამთავრობო სექტორთან, ასევე ბიზნესთან და გაგვეცნო საქართველო. შთაბეჭდილება ნამდვილად მოვახდინეთ და დარწმუნებული ვარ, რომ შემდეგი ორი დღე კიდევ უფრო მნიშვნელივანი იქნება მათთვის, რადგან ჩვენ მივდივართ საოკუპაციო ხაზთან.
ვფიქრობ, რომ მსგავსი ღონისძიება საქართველოს წარმოჩენას უწყობს ხელს და იმას, რომ ჩვენი ქვეყანა, რომელიც პრო-ევროპული არის და ევროპის გასაყარზეა, რეალურად იმ ღირებულებებს იზიარებს, რასაც მსოფლიო ეკონომიკური ფორუმი. იმედს ვიტოვებთ, რომ შემდეგ წელსაც მსგავს ფორუმს ჩავატარებთ“, - განაცხადა „ფერმერთა ასოციაციის თავმჯდომარე“ ნინო ზამბახიძემ.
„აჭარა ჯგუფის“ აღმასრულებელი დირექტორის, ვალერი ჩეხერიას თქმით, ის იმედოვნებს, რომ მსოფლიო ეკონომიკური ლიდერების სახით ქვეყანას ახალი ელჩები ეყოლება.
„სასიხარულოა, რომ ეს ხდება საქართველოში. ეს ხელს შეუწყობს ტურიზმის მოზიდვას, ახალი ადამიანების მიერ საქართველოს აღმოჩენას, ისეთი ადამიანების მიერ, რომლებიც თავის ქვეყანაში პოლიტიკური ან ბიზნესის სფეროდან არიან და საკმაოდ დიდი თანამდებობები უკავიათ. დღეს საქართველოში არიან ამერიკიდან, აზიიდან, ევროპიდან, ჩვენი მეზობელი ქვეყნებიდან და დარწმუნებული ვარ, რომ მათი სახით ახალი ელჩები ეყოლება ჩვენ ქვეყანას“, - განაცხადა „აჭარა ჯგუფის“ აღმასრულებელმა დირექტორმა, ვალერი ჩეხერიამ.
Young Glibal Leaders-ი მსოფლიო ეკონომიკური ფორუმის ნაწილია და 2004 წელს დაფუძნდა.
Young Glibal Leaders-ის წევრები მთავრობისა და ბიზნესის წარმომადგენლები, ნობელისა და ოსკარის ნომინაციის ლაურეატები, გაეროს კეთილი ნების ელჩები და სოციალური მეწარმეები არიან. თითოეული მათგანი დასახელებულია ინვატორული საქმიანობისთვის, პრობლემების მიმართ არაორდინალური მიდგომისა და მათი უნარისთვის ააგონ ხიდები კულტურის, ბიზნესების, ხელისუფლებასა და სამოქალაქო საზოგადოებას შორის.
ოთხდღიანი ღონისძიების თანასპონსორები საქართველოს ბანკი, GalT and Taggart-ი, თანაინვესტირების ფონდი და ტურიზმის ეროვნული ადმინისტრაცია არიან.