ჯულიან ასანჟის დაკავება მედიის თავისუფლების იდეალებთან წინააღმდეგობაში მოდის, - ამის შესახებ რუსეთის პრეზიდენტის პრესმდივანმა დიმიტრი პესკოვმა განაცხადა.
პესკოვმა იმედი გამოთქვა, რომ „ვიკილიქსის“ დამფუძნებლის ყველა კანონიერი უფლება დაცული იქნება.
„სინამდვილეში „ვიკილიქსი“ ინფორმაციის დამოუკიდებელი წყაროა, რომელსაც დევნიან. რა თქმა უნდა, ჩვენი თვალსაზრისით, ეს აბსოლუტურად არ შეესაბამება მედიის იდეალებს და თავისუფლებას, მედიის ხელშეუხებლობას. ამიტომაც ვიმედოვნებთ, რომ ჯულიან ასანჟის ყველა კანონიერი უფლება დაცული და უზრუნველყოფილი იქნება“, - განაცხადა დიმიტრი პესკოვმა.
შეგახსენებთ, რომ გუშინ „ვიკილიქსის“ დამფუძნებელი ჯულიან ასანჟი ლონდონის პოლიციამ ლონდონში, ეკვადორის საელჩოსთან დააკავა. მანამდე ეკვადორის ხელისუფლებამ მას დიპლომატიური თავშესაფრის სტატუსი მოუხსნა. ბოლო 7 წელი ჯულიან ასანჟს ლონდონში, ეკვადორის საელჩოში ჰქონდა თავშესაფარი მიღებული.