ყველა ფორმატს ვიყენებთ იმისთვის, რომ ჩვენი საერთაშორისო პარტნიორების ყურადღება მაქსიმალურად გავამახვილოთ ოკუპაციის პრობლემაზე, - ამის შესახებ პარლამენტის თავმჯდომარე ირაკლი კობახიძემ ჟურნალისტებს განუცხადა, რითაც გამოეხმაურა ევროპის საბჭოს მე-19 კონსოლიდირებულ ანგარიშს "კონფლიქტი საქართველოში".

"ჩვენ აბსოლუტურად ყველა ფორმატს ვიყენებთ იმისთვის, რომ ჩვენი საერთაშორისო პარტნიორების ყურადღება მაქსიმალურად გავამახვილოთ განსაკუთრებით ოკუპაციის პრობლემაზე და ყველა იმ გამოწვევაზე, რომელიც ჩვენს უსაფრთხოებასთან და ჩვენს რეგიონში სტაბილურობასთანაა დაკავშირებული,"- აღნიშნა კობახიძემ.

პარლამენტის თავმჯდომარე, ასევე, გამოეხმაურა ოპოზიციის ბრალდებებს იმის თაობაზე, რომ ხელისუფლებამ არაფერი გააკეთა რუსეთისთვის სანქციების დაკისრებისთვის ოთხოზორია-ტატუნაშვილის სიიდან გამომდინარე.

"არის კონკრეტული აქტივობები, არის კონკრეტული ქვეყანა, რომელსაც უკვე შესაბამისი მხარდაჭერა აქვს გამოცხადებული. მაგალითად, მხარდაჭერა ლიტვამ გამოაცხადა. ასევე, ამერიკასთან და ევროკავშირთან კონკრეტული საუბრები გვაქვს იმასთან დაკავშირებით, რომ ხელშესახები იყოს მათი პოზიცია ამ საკითხთან დაკავშირებით. მაქსიმალურად ვაქტიურობთ. ამ აქტიურობაში ჩართულია როგორც უმრავლესობა, ისე ოპოზიცია, მათ შორის საპარლამენტო ფორმატებში. მე ყველას მოვუწოდებ, ნაცვალად ასეთი არასწორი განცხადებებისა, საერთაშორისო დონეზე იაქტიურონ იმისთვის, რომ ყველამ ერთად მივაღწიოთ შესაბამის მიზნებს. ჩვენ საერთო მიზანი გვაქვს," - განაცხადა ირაკლი კობახიძემ.