დავით ბაქრაძე - გიორგი ქობულიას განცხადებები პირველ რიგში ნათია თურნავასთვის უნდა იყოს საყურადღებო - ხვალ-ზეგ ისიც დადგება ანალოგიური არჩევანის წინაშე

გიორგი ქობულიას განცხადებები პირველ რიგში, ნათია თურნავასთვის უნდა იყოს საყურადღებო, იმიტომ, რომ ხვალ-ზეგ ისიც დადგება ანალოგიური არჩევანის წინაშე, - ამის შესახებ „ევროპული საქართველოს" ლიდერმა დავით ბაქრაძემ „ინტერპრესნიუსს" განუცხადა. მისი თქმით, როდესაც ეკონომიკის ყოფილი მინისტრი ასეთ საგანგაშო განცხადებებს აკეთებს, აუცილებელია შედგეს საკომიტეტო მოსმენა. გარდა ამისა, როგორც ბაქრაძემ აღნიშნა, თუკი გიორგი ქობულიაზე ზეწოლა ხორციელდებოდა, ამის თაობაზე პირველ რიგში, ნათია თურნავამ უნდა იცოდეს.

„ბატონი ქობულია აუცილებლად უნდა მოვიდეს პარლამენტში საკომიტეტო მოსმენაზე, რისი სურვილიც მან გამოთქვა. ჩვენ არ ვაპირებთ ივანიშვილთან ან მამუკა ბახტაძესთან მისი პირადი უთანხმოებების შესახებ ჭორაობას. გიორგი ქობულიამ გააკეთა ძალიან მნიშვნელოვანი განცხადება, რომ მას ხელს უშლიდნენ იმ გადაწყვეტილებების მიღებაში, რაც აუცილებელი იყო ეკონომიკის განვითარებისთვის. როდესაც ყოფილი მინისტრი საუბრობს ამაზე, რა თქმა უნდა, ეს არის საგანგაშო. მას უნდა მიეცეს მოსვლის და საკუთარი პოზიციის გამოხატვის საშუალება. ამიტომ, არსებობს პარლამენტი და საკომიტეტო ფორმატი, რომ მოსმენა შედგეს. ყველაზე სწორი ფორმატი არის საკითხის კომიტეტზე განხილვა და არა ინტერვიუების და პრესკონფერენციების საშუალებით.

იმიტომაც არის ეს საკომიტეტო მოსმენა მნიშვნელოვანი, რომ ეკონომიკის ახალმა მინისტრმა იცოდეს, რა პრობლემები ჰქონდა მის წინამორბედს. თუ ბატონ ქობულიას მართლაც უშლიდნენ ხელს მნიშვნელოვანი გადაწყვეტილებების მიღებაში, თუ მას მართლაც სთხოვდნენ ისეთ გადაწყვეტილებებს, რომელიც აწყობდა რომელიღაც თანამდებობის პირს და ცუდი იყო ქვეყნისთვის, პირველი ვინც ამის თაობაზე უნდა იცოდეს, ეს არის ეკონომიკის ახალი მინისტრი იმიტომ, რომ ხვალ-ზეგ ქალბატონო თურნავაც დადგება ანალოგიური არჩევანის წინაშე. ამიტომ, რა თქმა უნდა, პირველ რიგში მისთვის უნდა იყოს ეს განცხადებები საყურადღებო,"- განაცხადა დავით ბაქრაძემ.

იოსებ ბარათაშვილი - ახლა მთავარია, გამოძიებამ უტყუარად დაადგინოს იმ პირების ვინაობა, რომელთა ქმედებამაც გამოიწვია შაქარაშვილის გარდაცვალება
ქართული პრესის მიმოხილვა 10.07.2020
ალექსეი მალაშენკო - ვინც არ უნდა მოიგოს საქართველოს არჩევნებში, აფხაზეთისა და სამხრეთ ოსეთის საკითხებში არაფერი შეიცვლება, ამიტომ, კრემლისთვის პრინციპული მნიშვნელობა არ აქვს, ვინ გაიმარჯვებს
ყაზახეთ-საქართველოს თანამშრომლობის ახალი ეტაპი იწყება
სუბსიდირებული იპოთეკური სესხი - ახალი შესაძლებლობა ტერაბანკისგან
სილქნეტის მობილური აბონენტები თიბისის მობაილბანკით სარგებლობას ინტერნეტის დახარჯვის გარეშე შეძლებენ