დანიაში საქართველოს ელჩმა აღმოსავლეთ პარტნიორობის ინიციატივის 10 წლის იუბილესთან დაკავშირებით, ლექცია წაიკითხა
დანიის სამეფოში საქართველოს ელჩმა, გიგი გიგიაძემ, აღმოსავლეთ პარტნიორობის ინიციატივის 10 წლის იუბილესთან დაკავშირებით, ლუნდის უნივერსიტეტში ლექცია წაიკითხა. როგორც „ინტერპრესნიუსს“ საქართველოს საგარე საქმეთა სამინისტროდან აცნობეს, ლექციის ფარგლებში გიგი გიგიაძემ აღმოსავლეთ პარტნიორობის ინიციატივის შექმნის წინაპირობებზე, განვითარების ისტორიასა და მომავლის პერსპექტივებზე ისაუბრა.
უწყების ცნობით, ლუნდის უნივერსიტეტის ევროპისმცოდნეობის სამაგისტრო პროგრამის სტუდენტებმა აღმოსავლეთ პარტნიორობის ინიციატივის ფარგლებში მიღწეულ წარმატებებსა და ამ მხრივ არსებულ გამოწვევებზე საქართველოს ელჩის შეფასებები მოისმინეს.
ლექციის შემდეგ გამართულ დისკუსიაზე სტუდენტებმა შავი ზღვის რეგიონში არსებული უსაფრთხოების გარემოსთან დაკავშირებითაც გამოხატეს ინტერესი.
