ავღანეთის დედაქალაქში „თალიბანის“ მებრძოლების მიერ საერთაშორისო არასამთავრობო ორგანიზაციის Counterpart International-ის შენობაზე თავდასხმას ხუთი ადამიანი ემსხვერპლა, 24 კი დაშავდა. ამის შესახებ ავღანეთის შინაგან საქმეთა სამინისტრო იუწყება.
ამ დრომდე მსხვერპლის შესახებ ინფორმაცია არ გავრცელებულა, ხოლო მანამდე არსებული ინფორმაციით, დაშავებული იყო 10 ადამიანი.
ოთხშაბათს ქაბულის იმ რაიონში, სადაც საერთაშორისო ჰუმანიტარული ორგანიზაციის ორი შენობა დგას, ისროდნენ და აფეთქება მოხდა. „ბოევიკების“ წინააღმდეგ სპეცოპერაცია თითქმის ექვს საათს გაგრძელდა. განადგურებულია ხუთი თავდამსხმელი.
მომხდარზე პასუხისმგებლობა მოძრაობა „თალიბანმა“ აიღო.