თქვენ ხედავდით, რომ ეს არ იყო უბრალოდ აღშფოთებული ადამიანის საუბარი, გაცემული იყო კონკრეტული დავალება ოჯახის წევრზე, - ამის შესახებ პარლამენტის თავმჯდომარე ირაკლი კობახიძემ ჟურნალისტებს მალხაზ მაჩალიკაშვილის საქმესთან დაკავშირებით განუცხადა. მისი თქმით, ძალიან კარგია, რომ სუს-მა ინფორმაცია გაასაჯაროვა.

ჟურნალისტების კითხვაზე, მოსალოდნელია თუ არა მაჩალიკაშვილის დაკავება, კობახიძემ უპასუხა, რომ მისთვის უცნობია, გავრცელებული ჩანაწერი იძლევა თუ არა ამ ეტაპზე მისი დაკავების შესაძლებლობას.

„მე არ ვიცი, ის ჩანაწერი იურიდიული კვალიფიკაციის კუთხით იძლევა თუ არა ამ ეტაპზე დაკავების შესაძლებლობას. ამაზე პასუხი უნდა გასცეს სამართალდამცველმა ორგანოებმა, თუმცა თავისთავად ამ ინფორმაციის საჯაროობა იყო მნიშვნელოვანი იქიდან გამომდინარე, რომ ის ემსახურებოდა დანაშაულის პრევენციას. თქვენ ხედავდით, რომ ეს არ იყო უბრალოდ აღშფოთებული ადამიანის საუბარი. გაცემული იყო კონკრეტული დავალება ოჯახის წევრზე. აქედან გამომდინარე, კონკრეტული ოჯახის მიმართ აშკარა საფრთხე იყო და ამ საქმეს სჭირდებოდა პრევენცია. ძალიან კარგია, რომ სუს-მა გაასაჯაროვა ინფორმაცია. რაც შეეხება ბრალდების სტანდარტს, ამასთან დაკავშირებით პასუხი უნდა გაგვცეს ბუნებრივია, სამართალდამცველმა ორგანოებმა,"- განაცხადა კობახიძემ.

იხილეთ ვიდეო