კომპანია „ყაზტრანსგაზ-თბილისი“ ნაძალადევის რაიონში მცხოვრები 8 ათასი აბონენტისთვის 50 წლის წინანდელი, ამორტიზებული და ძლიერ კოროზიული გაზის ქსელის სრულ რეაბილიტაციას ახორციელებს. როგორც „ინტერპრესნიუსს“ „ყაზტრანსგაზ-თბილისიდან“ აცნობეს, მასშტაბური სამუშაოები ასეულობით ათასი ლარის ღირებულებისაა. აღნიშნულ ქსელზე ათეული წელია, აღდგენითი სამუშაოები არ ჩატარებულა.

მათივე ინფორმაციით, ნაძალადევის რაიონში, კერძო სახლებში მცხოვრები აბონენტებისთვის კომპანია უსასყიდლოდ ასრულებს შიდა (ეზოებში) ქსელის რეაბილიტაციას. კომპანია აბონენტებისთვის თანამედროვე დონის, ევროსტანდარტებით დამზადებულ მრიცხველებს საკუთარი ხარჯებით ცვლის.

„ამჟამად მასშტაბური სარეაბილიტაციო სამუშაოები ჟღენტისა და პიონერის ქუჩებზე მიმდინარეობს. გაზის ქსელის რეაბილიტაციისა და მრიცხველების სრულად შეცვლის სამუშაოები 42 ქუჩაზე უკვე დასრულდა, მათ შორის ბახმაროს, ბენდელიანის, ბეჟანიშვილის, გომბორის, ნიკო მარის, კაჭრეთის, კნოლევის, ლამისყანისა და მათ მიმდებარე ქუჩებზე“, - აღნიშნულია ინფორმაციაში.