2018 წლის სტატისტიკას რომ გადავხედოთ, ჯანმრთელობის დაზიანების, დაჭრების გარკვეულ ნაწილს წინ ქუჩური გარჩევები უძღოდა, რაც მოქმედი კანონით, პირდაპირ კრიმინალიზებული არ არის, - ამის შესახებ ჟურნალისტებს შინაგან საქმეთა მინისტრის მოადგილემ ნათია მეზვრიშვილმა განუცხადა, რომლის განმარტებით, ასეთი 300-მდე დანაშაული ვლინდება.
„იმ ფონზე, როცა ქურდული სამყაროს წინააღმდეგ კანონი გავამკაცრეთ, გადავწყვიტეთ ეს ხაზი გაგვეგრძელებინა. ე. წ. ქუჩური გარჩევების მარეგულირებელი კანონმდებლობა სწორედ ამ ხაზის გაგრძელებაა. ე.წ. ქუჩური გარჩევის დასჯა იძლევა შესაძლებლობას, თავიდან იყოს აცილებული ისეთი დანაშაული, როგორიცაა მკვლელობის მცდელობა, რაც მძიმე კატეგორიის დანაშაულია“, - აღნიშნა ნათია მეზვრიშვილმა.
შინაგან საქმეთა მინისტრის მოადგილემ პარლამენტის იურიდიულ საკითხთა კომიტეტს პირველი მოსმენით სისხლის სამართლის კოდექსში დაგეგმილი ცვლილებები წარუდგინა, რომლის გათვალისწინებით, ე.:წ. ქუჩური გარჩევის კრიმინალიზება ხდება.