გიორგი მიქაუტაძე - ეუთო-ს ექსპერტებს მოსამართლეთა შერჩევის პროცედურების დაცვასა და მის მიმდინარეობაზე ჰქონდათ კითხვები

ეუთო-ს ექსპერტებს უზენაესი სასამართლოს მოსამართლეთა შერჩევის პროცედურების დაცვასა და მის მიმდინარეობაზე ჰქონდათ კითხვები, - ამის შესახებ იუსტიციის უმაღლესი საბჭოს მდივანმა გიორგი მიქაუტაძემ ეუთო-ს ექსპერტებთან შეხვედრის დასრულების შემდეგ განაცხადა.

მისივე თქმით, ექსპერტებისგან რეკომენდაციებზე საუბარი არ ყოფილა.

„შეხვედრის მიზანი იყო უფრო დეტალური ინფორმაციის მიღება იუსტიციის უმაღლესი საბჭოსგან თუ როგორ მიმდინარეობს პროცესი, როგორ უნდა განხორციელდეს იმ საკანონმდებლო მოთხოვნების დაცვა, რომელიც დაწესდა სპეციალურად უზენაესი სასამართლოს კანდიდატებისთვის, როგორ მოხდება კანდიდატების შესახებ ინფორმაციის მოძიება, მათი კომპეტენტურობის და კეთილსინდისიერების შემოწმების კუთხით, როგორ მოხდება კანდიდატების შემდგომი შეფასება და დასაბუთება საბჭოს მიერ მიღებული გადაწყვეტილების და სხვადასხვა პროცედურული ნაწილები, რომელსაც იუსტიციის უმაღლესი საბჭო განახორციელებს უახლოესი დროის განმავლობაში. რეკომენდაციები ჩვენს მიმართ დღეს არ გაჟღერებულა, ვინაიდან, კანონი არსებობს, რომლის მიხედვითაც დეტალურად არის პროცედურები გაწერილი. მათ ჰქონდათ კითხვები, მაგალითად, როგორ უზრუნველყოფს ინტერესთა კონფლიქტს და ეს არის სპეციალური წესი თუ ზოგადი ნორმები ვრცელდება",- განაცხადა მიქაუტაძემ.