იუსტიციის უმაღლესი საბჭოს გადაწყვეტილებით, 24 მაისს სხვადასხვა პოზიციებზე გამწესებულ მოსამართლეთა შორის არიან: ნაირა გიგიტაშვილი (სანდრო გირგვლიანის საქმის მოსამართლე), დავით კეკენაძე (ნორა კვიციანის საქმის მოსამართლე) და კობა გოცირიძე (მოსამართლე, რომელმაც ბიძინა ივანიშვილი 126 მლნ ლარით დააჯარიმა სატელიტური თეფშების საქმეზე 2012 წელს), - ამის შესახებ „ინტერპრესნიუსს“ პარტია „თავისუფალი საქართველოს“ პრესსამსახურიდან აცნობეს. როგორც პარტიის მიერ გავრცელებულ ინფორმაციაშია აღნიშნული, ხელისუფლება ცდილობს თანამდებობებზე სამარცხვინო მოსამართლეები დანიშნოს.

„თავისუფალი საქართველო“ 2013 წლიდან აპროტესტებს დანაშაულებრივი სისტემის მოსამართლეების სხვადასხვა მაღალ პოზიციაზე გამწესებას. მიუხედავად იმისა, რომ ხელისუფლებას რამდენჯერმე მოუწია ზოგიერთი კანდიდატურის უკან გაწვევა (მაგ: კეკენაძის კანდიდატურისა 2018 წელს), როგორც ჩანს, მმართველი გუნდი კვლავ ცდილობს „გააპაროს“ ეს სამარცხვინო კანდიდატურები.

სრულიად აშკარაა, რომ იუსტიციის უმაღლესი საბჭოს არსებული შემადგენლობისგან საზოგადოებას არ უნდა ჰქონდეს სასიკეთო მოლოდინები, მით უფრო მას შემდეგ, რაც სასამართლოში მოქმედი კლანი, კობახიძე-ზარდიაშვილის ხელშეწყობით, აღიჭურვა გაფართოებული უფლებამოსილებებით.

„თავისუფალი საქართველო“ მიიჩნევს, რომ სასამართლო სისტემაში შექმნილი კრიზისიდან გამოსავლის ერთადერთი გზა - იუსტიციის საბჭოს დაშლა და მოსამართლეთა კორპუსის ძირეული განახლებაა,“ - ნათქვამია ინფორმაციაში.