განათლების მინისტრის მოადგილე უსაფრთხო სკოლების საერთაშორისო კონფერენციაში მონაწილეობს
საქართველოს განათლების, მეცნიერების, კულტურისა და სპორტის მინისტრის მოადგილე, ნათია ზედგინიძე და სსიპ საგანმანათლებლო დაწესებულების მანდატურის სამსახურის უფროსი გელა გელაძე უსაფრთხო სკოლების მე-3 საერთაშორისო კონფერენციაში მონაწილეობენ.
მეცნიერებისა და განათლების სამინისტროს ინფორმაციით, კონფერენცია გაერო-ს განვითარების პროგრამის (UNDP), ნორვეგიისა და ესპანეთის მთავრობების მხარდაჭერითა და ორგანიზებით, ესპანეთის ქალაქ პალმა დე მალიორკაში იმართება.
მათივე ცნობით, საერთაშორისო კონფერენციაზე საგანმანათლებლო დაწესებულებებში უსაფრთხოებასთან დაკავშირებით არსებულ გამოწვევებს განიხილავენ და სხვადასხვა ქვეყანაში არსებული საუკეთესო პრაქტიკის გათვალისწინებით, მათი გადაჭრის გზებზე მსჯელობენ.
კონფერენციაში მონაწილეობენ ესპანეთის საგარეო საქმეთა მინისტრი ჯოზეფ ბორელი, UNICEF-ის აღმასრულებელი დირექტორი ჰენრიეტა ფორე, გაერო-ს გენერალური მდივნის სპეციალური წარმომადგენელი ბავშვთა და შეიარაღებული კონფლიქტების საკითხებზე, ასევე დასავლეთის ქვეყნების მთავრობების, ასევე, საერთაშორისო და სამოქალაქო საზოგადოების მაღალი რანგის წარმომადგენლები.
v-if="article.gallery" v-html="article.gallery"
