უკრაინაში საქართველოს საელჩომ საქართველოს დამოუკიდებლობის დღისადმი მიძღვნილი საზეიმო მიღება გამართა.

როგორც „ინტერპრესნიუსს“ საგარეო საქმეთა სამინისტროდან აცნობეს, დამსწრე სტუმრებს მისასალმებელი სიტყვით უკრაინაში საქართველოს საგანგებო და სრულუფლებიანმა ელჩმა, გელა დუმბაძემ და უკრაინის საგარეო საქმეთა მინისტრის მოადგილემ, ვასილ ბოდნარმა მიმართეს.

საგარეო უწყების ცნობით, მათ ორ ქვეყანას შორის არსებული მჭიდრო მეგობრული ურთიერთობები აღნიშნეს და თანამშრომლობის გაღრმავების პერსპექტივებზე ისაუბრეს. საზეიმო მიღებაზე საკუთარი შემოქმედება წარადგინეს უკრაინაში საქართველოს დიასპორის ცეკვის ანსამბლებმა „იბერიელი“ და „იბერია“.

ოფიციალურ მიღებას უკრაინის საკანონმდებლო და აღმასრულებელი ხელისუფლების წარმომადგენლები, დიპლომატიური მისიის ხელმძღვანელები, საზოგადო მოღვაწეები, არასამთავრობო სექტორის, ქართული დიასპორის, ბიზნესისა და კულტურის სფეროს წარმომადგენლები დაესწრნენ.