“ევროპული საქართველო“ პარლამენტისგან “თიბისის“ საქმეზე დროებითი საგამოძიებო კომისიის შექმნის ინიციატივის განხილვის დაჩქარებას ითხოვს.

საკითხი პარლამენტის ბიუროს სხდომაზე დეპუტატმა სერგო რატიანმა დასვა.

“ვხედავთ, რა მნიშვნელობა ჰქონდა პარლამენტის მხრიდან ხორავას ქუჩის საქმის გამოძიებას. სხვა მიმართულებით არის ინიციატივები, ეს “თიბისის“ და “თიბისი ჯგუფთან“ დაკავშირებულ პრობლემებს ეხება. დავაჩქაროთ ამ მიმართულებით პარლამენტის საგამოძიებო კომისიის შექმნა. ვხედავთ, რომ პარლამენტის ეს ბერკეტი არის ქმედითი და ის ადრე თუ გვიან თავის შედეგებს გამოიღებს“, - განაცხადა სერგო რატიანმა პარლამენტის ბიუროს სხდომაზე.

“ევროპულმა საქართველომ“ მარტის თვეში წარადგინა პარლამენტის დადგენილების პროექტი, რომელიც “თიბისი“ ბანკსა და “ანაკლიის განვითარების კონსორციუმთან“ დაკავშირებულ პირებზე შესაძლო ზეწოლის შემსწავლელი პარლამენტის დროებითი საგამოძიებო კომისიის შექმნას ითვალისწინებს.