მცხეთის პოლიციის სამმართველოში, ყაზბეგში, ვერტმფრენის ჩამოვარდნის საქმეზე „რუმს ჰოტელ ყაზბეგის“ თანამშრომლების გამოკითხვა მიმდინარეობს. ამჟამად სასტუმროს ხუთი თანამშრომელი აძლევს ჩვენებას.
ამავე საქმეზე გასულ კვირას „ავიატორ +“-ის დირექტორის მოადგილე და სასტუმროს რამდენიმე თანამშრომელი გამოიკითხა.
მომხდარ ფაქტზე გამოძიება სსკ-ის 275-ე მუხლის მეექვსე ნაწილით, საჰაერო ტრანსპორტის მოძრაობის უსაფრთხოების ან ექსპლუატაციის წესის დარღვევის ფაქტზე მიმდინარეობს, რასაც მოჰყვა ორი ან მეტი ადამიანის სიცოცხლის მოსპობა.
შეგახსენებთ, რომ 6 ივნისს, „ავიატორ +“-ის კუთვნილი ვერტმფრენი ე.წ. „ყანების ტერიტორიაზე", დაუსახლებელ ადგილზე ჩამოვარდა. შემთხვევის შედეგად ვერტმფრენის ბორტზე მყოფი სამივე ადამიანი: ეკიპაჟის წევრები - მფრინავი, გიდი და სასტუმრო „რუმსის" ერთი თანამშრომელი დაიღუპა.