აქციებზე არ წარმოვადგენ არც ერთ პოლიტიკურ ძალას და თუ ვინმე უსმენს ჩვენ გამოსვლებს, ეს იკითხება ჩემი გამოსვლების პათოსში, - ასე გამოეხმაურა მიშა მშვილდაძე გადაცემა "საღამოს NEWSROOM"- ში ზაქარია ქუცნაშვილის განცხადებას.

"ეჰ, ზაქარია ქუცნაშვილი ალბათ, შედის იმ ძალიან ცოტა ადამიანების რიცხვში, რომლებიც უბრალოდ ვერ მიხვდნენ გავრილოვის ჩამოყვანა და იმ სავარძელში ჩასმა რას ნიშნავდა. შესაბამისად, ზაქარიას მოსაზრებებიც საკმაოდ ექვემდებარება გადამოწმებას. ამ აქციაზე ვდგავარ როგორც "თავისუფლების გამავრცელებელი" საზოგადოების შიდა გამოკითხვაში არჩეული ერთ-ერთი სპიკერი. ჩემი პირადი პოლიტიკური გემოვნება ჩემი პირადი საქმეა, თუმცა ამ მიმართულებითაც თუ ვინმეს განსაკუთრებული ინტერესი აქვს, შემიძლია დავაკმაყოფილო და ვუთხრა, რომ ამ აქციაზე არ წრმოვადგენ არც ერთ პოლიტიკურ ძალას თუ ვინმე უსმენს ჩვენ გამოსვლებს, ეს იკითხება ჩემი გამოსვლების პათოსში, "-განაცხადა მშვილდაძემ.

ზაქარია ქუცნაშვილმა „ინტერპრესნიუსს“ განუცხადა, რომ აქციები, რომელიც რუსთაველზე ბოლო რამდენიმე დღის განმავლობაში მიმდინარეობს, მართულია.

„ვინ უძღვება აქციებს, ყველა ხედავს. მიშა მშვილდაძე „ნაციონალური მოძრაობის“ აქტიური მხარდამჭერია. საზოგადოების მოტყუება, რომ ეს აქციები მართული არ არის ან აქციის ჩატარებით პარტიები დაინტერესებულები არ არიან, მე არ მჯერა. ვინ არის მიშა მშვილდაძე?! იუმორისტი? - უკრაინაშიც ეგონათ ზელენსკი იუმორისტი და ყველამ ნახა, რომ თავიდან ბოლომდე ყოფილა პოლიტიკაში ჩართული. მიშა მშვილდაძე არ გახლავთ იუმორისტი, ის „ნაციონალური მოძრაობის“ პირდაპირი აპოლოგეტია“, - დასძინა ზაქარია ქუცნაშვილმა.

იხილეთ ვიდეო